Kum 2024-25 chhung khan Mizoramah POCSO (Protection of Children from Sexual Offences Act, 2012) case 480 a awm niin tun hnaia State Child Welfare and Protection Committee thutkhawmnaah tarlan a ni a. Chumi awmzia chu, POCSO case hi chawhrualin ni tin pakhat aia tam (1.3) a awm tihna a ni. Hei hi sawrkar kum kalta chhunga thil thleng kha a ni.
Sawrkar kum thar 2025 April – June chhunga naupang chunga hleilenna leh harsatna tawh avanga Childline leh W&CD Control Room hnena harsatna thlen hi mi 1512 an awm leh tawh a, heng zinga 430-ah hian thubuai ziah luh a ni tawh bawk.
Chuti a nih chuan, kumin thla thum (April-June) chhung leka POCSO thubuai ziah luh hi nikum chhunga POCSO case ziah luh nen a inzat thuak tawh tihna a ni a. Report-ah hian thla kalta July kha tel hman ta se, nikum chhunga POCSO case aia tam kha a awm thei tawh tihna a ni awm e.
Chutih rualin, naupang chungchanga nikum chhunga Childline leh W&CD Control Room-a harsatna thlentu hrim hrim 1651 an awm laiin, kumin thla thum chhung lek hian mi 1512 an awm tawh bawk. Chuti a nih chuan, naupang chunga hleilenna leh hursualna hi a hluar tual tual tihna a ni.
Hmasawnna kawng kan zawh mek a, infrastructure development hrang hrang kan buaipui mup mup a, thlawhna tumhmun kan ti, rel kawng kan ti, motor kawng kan ti, tunah pawh kawngpui chhia kan la buaipui luai luai hi! A lehlamah ruihhlo, HIV/AIDS, drug addict kan buaipui luai luai bawk a, crusade/camping kan ti, kan va han buai tak em! Corruption nen!
Hetia kan buai luai luai lai hian, kan fanu duat laite leh kan fapa duat laite chuan a ruka khawih chhiat/tih thlabar an lo tawk ve mek a, chu chu a hluar tulh tulh lehnghal!
Heng kan data neih atanga han chhut chet chet hi chuan, kan dinhmun hi a chhe hle, a hlauhawm hle bawk; inralrinna dar khawn rik (red alert) bawl bawlna tur hliah hliah a ni tawh. Ni tin naupang pakhat aia tam khawih chhiatna a thleng tawh a nia!
Kristian ramah hian, engati nge heti em ema sualna hi a punlun tak le? Heng kan chunga thil tha lo thleng zawng zawngte hi keimahni cho chhuah a ni mai lo em ni? Biak ina lut kan tam thin tehlul nen hian, engtin nge maw hetiang hi kan chunga a thlen reng theih le? tih hi i inzawt sup sup teh ang u!
POCSO case pung tual tual….
