November 7, Ningani zan khan Europa League khelh chhunzawm a ni a. Season thara chak la nei lo Manchester United chuan an mualah ngei hnehna an chang ve ta nge nge. United an chak lai hian EPL club lian Tottenham an lo tlawm ve thung.
United 2-0 PAOK Salonika
Europa League season tharah beisei anga bul tan tha lova, khelh thum chhung an khingpuite nena inhnehtawk zawn tawh Manchester United hian Old Trafford-ah Greek club lian PAOK Salonika an mikhual. An mikhual lakah bul tan tha lua lo mah se chawlhlawk hnu lama Amad goal hnih thun hmangin an chak.
Chawlhlawk hmain United leh PAOK Salonika te hi an inhnehtawk viau a, goal thun tumin an innawr nasa dun hle. Goal thun tumin innawr nasa viau mah se goal thun thei an awm lova, inhnehtawk chungin chawlhlawk an hmang.
Chawlhlawk hnu lamah United an khel tha leh zual a, goal pawh an thun ta thuai. Season half tan tirh lam, minute 50-naah Amad chuan captain Bruno Fernandes siamsak atangin hmahruaina goal a thun. Hmahruaina goal an thun vangin inrintawkna sang zawk nen an inlan chhunzawm. Greek club POAK hian an si phurh sut tum viau mah se an hlawhtling zo lova, goal an chhuah belh ta zawk. Red Devils tan hmahruaina goal thuntu Amad chuan minute 77-naah an goal hnihna a thun zui leh a, an hmahruaina a tizau. Amad goal thun hnu hian goal dang a luh belh thei tawh lova, United chuan Europa League season tharah a vawi khat nan hnehna an chang ve ta nge nge a ni.
United hian manager Erik ten Hag an ban an ngeih chho viau a, manager lailawk Ruud van Nistelrooy hnuaiah an chetha thawkhat viau. United hian manager thar atan Ruben Amorim an dawr fel vek tawh a, Sporting Lisbon enkawl mektu hi an la lut dawn hnai tawh. Amorim luh hunah Van Nisterooy hian Old Trafford a chhuahsan zui nghal dawn a. Old Trafford atanga a inputchhuah hmain Reds Devils hi a kaihruai leh rih ang.
POAK lakah an chak vangin United hian khelh li atangin point 7 an hmu a, 15-naah an inhlangkai. Table-ah hmasawn hret mah se EPL ang thoin an invawh sang tak tak tak thei chuang lo rih thung. United lakah an tlawm vangin PAOK dinhmun a chhe leh zual thung a. Anni hian khelh li atangin point khat chiah an la hmu.
Tottenham an tlawm
A vawi khat nan Manchester United in hnehna an chan laiin bul tan tha tak, vawi thum chak zawn tawh Tottenham Hotspurs chu a vawi khat nan an tlawm ve thung a. Spurs hian tlem zawk ni chungin Galatasaray an hneh lo.
Turkish club lian Gala-tasaray hian an mikhual Tottenham lakah bul an tan tha viau a, chawlhlawk hmain goal thum ngawt an thun hman. An si phurh sut tuma tan an khawh vanglai takin Tottenham player Will Lankshear hnawhchhuah a ni. Tlem zawk an nih vangin Spurs tan chet thawh zui chiam a har a, a vawi khat nan an tlawm phah a tih theih.
Galatasaray tan hian Yunus Akgün chuan inkhel tan atanga minute rukna lekah hmahruaina goal a thun nghal. Hma takah goal an thun vangin phur viau mah se an phur rei lova, goal an chhuah ve thuai. Tottenham tan hian Will Lankshear chuan minute 18-na lekah goal thunin an si phurh a sut. Hma takah goal hnih a lut hian inkhel a tihmuhnawm zual a, goal thun tumin an innawr tawn nasa hle.
Goal lut a chawlh deuh det hnuin EPL club lian zawkte pawhin lak an duh em em Victor Osimhen chuan minute 31-naah mualneitu tan goal a thun a, Galatasaray in hma an hruai nawn leh. Oshimhen vek hian minute 39-naah an goal thumna a thun belh zui leh zat a, 3-1 a hmahruai chungin chawlhlawk an hmang zui ta a ni.
Chawlhlawk hnu lamah Tottenham an khel tha zui viau a, goal thun tuma tan an khawh vanglaiin an chesual tlat thung. An goal khatna thuntu Will Lankshear chu minute 60-naah hnawhchhuah a ni. Si hnih phur chunga tlem zawk an nih leh zel vangin Tottenham dinhmun a chhe viau. An dinhmun chhe viau mah se goal erawh an thun belh leh tlat thung. Tlem zawk an nih atanga minute 9 hnu lekah Dominic Solanke chuan goal thunin an si phurh a sut then. Solanke goal thun hnu in tlawm pumpelh tum viau mah se goal dang an thun belh thei tawh lova, uiawm takin an tlawm zui ta a ni.
Point 5 in Liverpool an sang fal
