May 2, Inrinni zan khan English Premier League 2025-26 khelh chhunzawm a ni a. Arsenal chuan an mikhual Fulham chu 3-0 in an hneh a, point 6 leh goal difference-ah goal liin hma an hruai. Inkhel dangah Tottenham Hotspurs lawm nan West Ham United an tlawm.
Arsenal an phur
Hun pawimawh laia inhliam thin Bukayo Saka a dam a, Fulham lakah goal a thun bakah assist vawi khat a nei. Saka a dam tha a, striker Viktor Gyokeres-a’n goal hnih a thun bawk vangin Arsenal an phur hle. Fulham lakah hian manager Mikel Arteta chuan an squad a siksawi a, tlarhnungah Christian Mosquera leh Hincapie te awltirn Ben Whites hian Riccardo Calafiori a luhtir. Muallaiah Martin Zubimendi aiah rawlthar defender Myles Lewis-Skelly a luhtir a, tlarhma lamah Saka-a’n bul a tan thei ta bawk. Arteta-a’n a luhtirte hian an khel tha em em vek a, hei hian Arsenal tantute a tiphur leh zual hle bawk a, champion theih beiseina sang zawk an nei thar.
An elpui lian Manchester City tan delh rittu lian zawk siamsak tura chak mamawh Arsenal hian Emirates Stadium-a an mikhual Fulham lakah an khel tha hle a, goal pawh an thun hma hle. Saka chuan mawi zeta Fulham defender Robinson a bum kual hnuin tha zetin Viktor Gyokeres tan a chhawpsak. Awmna hmun tur dika awm Gyokeres hian a hun dikah awlsam takin a pet goal a, inkhel tan atanga minute 9-na lekah hmahruaina goal a thun nghal.
Hma takah goal an thun vangin Arsenal an phur a, goal thun belh tumin an khingpuite an nawr na hle. Goal thun theihna hun tha nei bawk mah se uiawm takin an hlah a, Riccardo Calafiori tauh goal mawi tak pawh offside vangin hnawl a ni bawk. An hun tha neih an hlah zel hnuin Saka chuan near post ah fuh zetin a pet goal a, minute 40-naah an goal hnihna thunin an hmahruaina a tizau.
Champion thei tura chak mai bakah goal thun tam mamawh Arsenal hian goal tam zawk thun tumin an khingpuite an nawr zui zel a. Chawlhlawk dawn hnaih minute 45+4-ah Leandro Trossard ball vawrh luh tha tak chu Viktor Gyokers chuan fuh zetin a tauh goal a, an goal thumna a thun a. Arsenal hian 3-0 a hmahruai chungin chawlhlawk an hmang.
Chawlhlawk hnu lamah inkhel a hmuhnawm chhunzawm a, Arsenal in an khel tha chhunzawm. Khel tha zui tho mah se manager Mikel Arteta chuan Thawhleh zana champions league semi-final khelh zui leh mai tur an tih a hrereng a, a player tha Saka a lachhuak thuai a. Player daih zai Decland Rice leh forward Viktor Gyokers te a thlak rual bawk. Gunners hian hun tha nei zui bawk mah se uiawm takin an hun tha neih an hlah a, goal dang thun belh tawh lovin an mualah 3-0 in an chak a, point thum hlu tak an hmu.
Champion chaka tuihal Arsenal hian pahnihna Manchester City lakah point 6 zetin hma an hruai fal ta a, City ai hian vawi hnih ngawtin an khel tam zawk thung. City hian zanin hian Everton an hmachhawn dawn a. Goodison Park-ah an chak zo lo a nih chuan champion an beiseina a chuai ve deuh salh ang.
Arsenal leh City te hi an inel tawk em em a, khelh inzatah an point hmuh zat a inan bakah goal difference-ah pawh an la inang leh ta zel a. An khingpuite laka goal thun hnem zawk City in an chungnung hret zawk. Tunah chuan Arsenal hian point 6-a hma an hruai fal bakah goal difference-ah goal 4 in an sang ta a. Goal difference-a a san zawkna hi champion pui nawlh thei dinhmunah an ding.
Tottenham lawmna West Ham chak lo
Inrinni zana inkhel dangah West Ham United chu Gtech Community Stadium-a an khingpui Brentford lakah 3-0 ngawtin an tlawm. West Ham an tlawm hi Tottenham tan lawmna, chanchintha a ni.
EPL atangin Wolves leh Burnley an tlahniam tawh a, West Ham leh Tottenham ten him an inchuh mek. West Ham an chak loh vang hian Aston Villa lakah an chak a nih chuan Tottenham an him chiah chiah rih ang.
Point 6 in Arsenal in hma an hruai
