Police-ah post 4000 chuang a ruak
Kum 5 chhungin police 672 an thi
Mizoram Police department-ah post 4000 chuang a ruak a, hetihlai hian tunhnai kum 5 chhungin damlohna avangin police 672 an thi.
Assembly Session-a zawhna chhangin Home minister K Sapdanga chuan, Police department-ah mihring leh fund an indaih lo nasa a, post 4600 vel a ruak mek tih a sawi. Police indaihloh avang hian outpost/ beat post hawn tharah thawktu an la indah hleithei loa, thawktu an tlemnaah pawh indah belh a theih rih loh tih a sawi a ni.
Hetihlai hian IGP kaihhruaiin an department dinhmun zirchiang turin Committee an din a. An ni hian mamawh dan leh mamawh zualna bik an zir a, rawtna an bawk tih a sawi. Police training mek an awm a, fund pawh an hmuh ang ang chu mamawh zualna, a bikin ramri lam ngaipawimawhin an semrual zel dawn tih a sawi a. Police hmunhma thawmthat pawh hetiang hian fund remchan dan anga thawh zel tum a ni tih a sawi a ni.
Police department-ah kum 2021 khan mithhi 134, 2022-ah 145, 2023-ah 123, 2024-ah 146, 2025-ah 124 an thi a, a vaia belhkhawmin mi 672 an ni tih Home minister hian a sawi. An chhinchhiah danin, an thihpui tam ber chu cancer leh thin ro a ni a, ngun takin department hotuten an ngaihtuah a; kum 2024 leh 2025 khan ‘fitness’ lamah tan an la a, hei hian awmzia a nei viau in an hria tih a sawi. Medical lam mite nen inrawnin police mite hrisel zawkna atan theihtawp chhuah zel an tum tih a sawi a ni.
Police-ah post 4000 chuang a ruak Kum 5 chhungin police 672 an thi
