Bawngkawn Police chuan heroin tawlhruk tuma anmahni bum tumtu mi pathum leh an lirthei khalhtu mi pakhat an man.
Thudawn danin, June 26 tlai dar 5.10 khan Seling Zero Point-a police duty-ten auto rickshaw-a chuang hmeichhe pathum hnen atangin heroin an man a. An zawh chiannaah Manipur atanga Mizorama lut, Aizawl lam pan Bolero AS-06 AA 8922 a chuang an ni a, Seling Zero Point-ah hian police duty pumpelh tumin auto-rickshaw an hmang a ni. Hmeichhe pathum hian heroin hi a hran theuhin an keng vek a. Tingboichong Haokip, Salemphai Manipur nia insawi kut atangin gram 13; Nemreikim, Mongjang Manipur nia insawi kut atangin gram 185.66 leh Nemneihling, Salemphai Manipur nia insawi kut atangin gram 200.98 an man. Bolero khalhtu Thangchungha, Bolgol Manipur nia insawi pawh an man zui bawk.
Seling hi Bawngkawn Police Station huamchhunga awm a ni a, Bawngkawn P/S ah hian thubuai ziahluh a ni.
Police bum tum heroin kengtu man
