Chhattisgarh-a Bijapur district-ah Maoist-ten police hnena an chanchin hrilhtu nia an hriat pahnih an that tih Thawhlehni khan thuneituten an sawi a, pakhat zawk hi an zinga tel ve thin a ni nghe nghe.
He thil hi Thawhtanni zana Bugdicheru khuaa thleng a ni.
Tute nge an nih hriat loh Maoist-te hi khuaah lutin Karam Raju (32) leh Madvi Munna (27) te chu an in atangin an hruai chhuak a. Thil hriam tak hmangin an nghawngah an zai thler a, a hmunah an thi nghal niin police hotuin a sawi.
Khaw miten police an hrilh hnuah police team hi rang taka che chhuakin a tuk zingah an thleng a, ruangte senghawiin endik turin an la zui.
An ruang hmuhna bulah hian Maoist Jagargunda Area Committee-in pamphlet an tihchhuah chu chhar a ni bawk.
Raju-a hi tun hma lam chuan Maoist che nasa thin tak a ni a, thuneitute hnenah inpein khuaah hian nun dan pangngaiin a nung zui.
Police-in an chhui zuinaah chuan Maoist-te hian Munna-a hi a hma pawhin police hnena an chanchin hrilh thina puhin an lo sawisa fo tawh thin a. A u mipa pawh kum tam vak lo liam taah khan Maoist-te hian an thenawm, Dantewada district-a Potali khuaah an lo that tawh bawk.
Maoist-te hian tun hnaiah venhim hna thawktute beihpui thlakna avangin an mi langsar leh member tam tak an chân a. An thunun thin hmunah security camp thar tam tak bun a nih avangin an ram pawh a zim zel bawk.
Maoist-te hian khuaa tribal pawisawi lote chu bitumin anmahni phatsana police hnenah thil hrilhtuah an puh thin niin police hotu chuan a sawi.
January 26 khan Bhairamgarh, Bijapur-ah kum 41 mi pa chu an chungchang sawi darha puhin an lo that tawh a. January 16 khan pa kum 48 mi chu Mirtur, Bijapur-ah police hnena an chanchin hrilha puhin an lo thah tawh bawk.
Police-in an chhinchhiah dan chuan Bastar region an tih, district pasarih huam chhungah Maoist-te tharum thawhna avangin nikum chhung khan civil mi 68 an thi.
Kuminah hian Chhattisgarh-ah hian Maoist 50 thah tawh an ni a, nikum khan 219 thah an ni bawk tih police chuan an sawi bawk.
Police hnena hektua puhin Maoist-in mi pahnih that
