Police-in mi panga thattua puh tlan chhuah tum kap hlum

Guwahati, Assam-a sumdawng, kar hmasaa khualbuk bula mi panga kap hlumtu nia puh chu police kut atanga tlan chhuah a tum avanga beih zuinaah kah hlum a ni tih thuneituten an sawi.
Ghanakanta Gogoi-a hi khualbuk luah chungchanga inhnial buaina avanga mi panga thattuah puh a ni a, Guwahati atanga km 350 vela hla, Sibsagar-ah thubuai dangah hruai a ni a. Nilaini zing dar 3:12 velah kalkawngah kah hlum a ni tih an sawi.
“Gaurisagar an thlenin inthiar a duh thu a sawi a. Lirthei atanga an chhukpui chiahin investigating officer-in pistol ken lai chu a chuh thut a, an buai zui ta a ni,” tiin Sibsagar Senior Superintendent of Police Papori Chetia-i chuan a sawi.
“Police dang pakhat awm ve chuan a senior officer chhan nan a silai kawl lai hmangin a kap ta a, Gogoi-a hian hliam a tuar a. Sibsagar civil hospital-ah hruai niin a thi tih puan a ni zui ta a. Kan officer pakhatin hliam tenau a tuar ve a, damdawi inah dah a ni,” a ti.
October 26 khan Gogoi-a hian Hotel Bilas Inn neitu telin mi paruk a kap nia puh a ni a. Khualbuk neitu, Helena Bharali (58) telin mi panga chu a hmunah an thi a. Khualbuk bula Bora Service hmun luah chungchanga inhnial buaina atanga inkahna hi thleng nia hriat a ni.
Hemi ni hian Gogoi-a hi man niin chawlhkar khat chhung police-in an kawl hnuah Thawhlehni khan Guwahati court-in judicial custody-a awm turin a ti a; mahse, Sibsagar district police-ten hemi ni tlaiah man velehin an district-a hruai an tumna kawngah tlan chhuah tumin a thih phah ta niin Chetia-i chuan a sawi.
Sibsagar-a hruai a nih dawn hian himna tha tawk pek a phut angin Kamrut Metro district-a district court chuan ni tlak hnua hruai chhuah a phal lo va. Police chuan himna tha an tiam thung.
“Court-in thupek a siam hi thil kalphung a ni a; mahse, Gogoi-a hi dan bawhchhia, inkahnaa inhnamhnawih a ni a. Guwahati atanga Sibsagar thleng him taka thlenpui kan tiam a; mahse, police tana hlauhawmin amah zawk a che a. Theihtawp kan chhuah chungin kan team member-te kan hum a ngai ve tlat a ni,” tiin Chetia-i chuan a sawi.
Gogoi-a hian Sibsagar-ah hian mi bum leh lehkha lem siam thubuai a nei a. Fel tawk lovin loan-in lirthei leiin a ziak lut bawk a, chhui mek a ni tih a sawi.