Lawngtlai district Borapansury khuaa Mizoram Police mi pahnih kut thlak an nih chungchangah Police hotute chuan FIR a lut tawh tih sawiin chhuichian mek a ni a, pawikhawihtute chu thubuai siamsak ngei an tum tih an sawi.
MZP Gen. Hqrs thuchhuak chuan, Borapansury-a Mizo Police pahnih kutthlaktu Chakma-te chu case siamsak a, an phu tawk hremna pe turin sawrkar a lo ngen tawh a. An ngen anga hmalakna a awm mai loh avangin Chakma pawn chhuah a khap tih a sawi a ni.
Hemi chungchangah hian Home minister K. Sapdanga chuan MZP hruaitute lenga a sawm angin, Thawhlehni zan khan a chenna inah an hmu a, MZP duhdan an sawipui.
Nilaini zing dar 9 khan Chakma-te pawn chhuah khapna chu zawm a nih leh nih loh enfiah turin Nilaini zing khan MZP hian hnatlang a ko a. Hunthar Venga Chakma House leh MLA pahnih chenna Legislator Home Tuikhuahtlang kawtah an pungkhawm. An punkhawmnaah hian Home secretary Vanlalmawia, DIG (Northern Range) H Ramthlengliana leh police hotute nen sawiho leh a ni.
Home department hotute leh police hotute chuan, MZP duhdan anga hma lak mek a nih thu leh FIR pawh a luh tawh thu an sawi a. Chhuichian mek niin, thil tisualtute case siamsak ngei an tum thu an sawi avangin MZP chuan punkhawm hi an titawp rih a. Ngun taka sawrkar hmalak dan enzui zel an tum tih an sawi a ni.
MZP resolution:
* Borapansury-a thil thleng chungchangah FIR thehluh niin, register tawh a ni a. Chak taka bawhzui tur leh a mawhphurhtu misualte na taka hrem turin MZP chuan sawrkar a ngen.
* Mizoram sawrkarin a mi leh sa sawisak a nih chungchangah misualte chet dan hi magisterial enquiry la ngei se MZP chuan a duh a. Misualte rang taka chhuichhuak a, hremna pe ngei turin a phut.