Police constable 350 an lak turah a fel leh tling rual zingah a chak chak thlan an duh tih Home minister K Sapdanga chuan a sawi a. Police officer “No Sir” an ti ngam an nei chu chhuanawm a tih thu sawiin, “No Sir” ti ngam hnawk an tih tawh chuan thuneituten inenlet an mamawh hle tawh tihna a ni tih a sawi.
Home minister hian Zirtawpni khan Kolasib district-ah Serkhan Police Out Post a hawng a. Mizoram Police indaih lohna a na hle a, an mamawh zat an la indah thei lo, tiin, “Post ruak hnawh khah loh 4800 vel a awm a, sum lam harsatna avangin kan indah khat zung zung thei lo. Police-te an thawkrim a, indaih lo chung chungin thahnemngai takin an thawk a, he Out Post hawn thar pawh hian mipui thlawpna leh thawhpuina a mamawh hle dawn a ni,” a ti.
Sawrkar thara police recruitment hmasa ber nikuma an neih khan, laina leh party mi induhsakna tel loin, a tling tling dik taka la turin ngenna an siam a, police officer-te duh zawng tak a lo ni a, an thawhrim azarah thianghlim takin recruitment an ti thei tih a sawi. Tunah post 350 atana an lak leh tumah pawh lak dan thianghlim bakah tha lehzuala tih dan tur an officer-ten an hriat belh zel a, physical efficiency test chu qualifying round atana hman bakah merit siamna atan hman tel a ni anga, mark a pu tawh dawn tih a sawi. “Mifel leh tling rual zingah a chak chak thlan chhuah kan duh,” a ti.
Kum kalta kha fitness uar kumah an hmang a, a sawt thawkhat viau a, kuminah discipline uar kum an puang leh tih K Sapdanga hian a sawi. “Dik tak chuan a hautak khawp mai. A chhan chu, recruitment kan lo kalpui thin dan a dik loh em vang a ni. Theihtawp kan chhuah chhunzawm anga, police nihphung bawrhbang zawnga che chu kan indim der der loang,” a ti.
Mizoram Police officer-te fakawm a tih em em chhan chu, a tul phawt chuan “No Sir” an ti ngam tih a sawi a. “No Sir” ti ngam hnawk ti an awm chuan ram leh hnam tana mi hnawk an ni zawk tawh tih a sawi.
Police leh tlawmngai pawlte avangin ruihhlo an man tam chho mawlh mawlh hle a, kuhva tawlhruk man kawngah police-te hma an lak that avangin kuhva chingtute lawmna a sang hle tih Home minister hian a sawi a. Home department hotuten Serkhan Police Out Post siam tul an tih chhan pawh, kuhva tawlhruk chan- khan atana tih a ni a, kuhva huan siama eizawngte tan he Out Post hi a hlu lehzual tih a sawi a ni.
Mizoram Police IGP (Hqrs) H Ramthlengliana report danin, Serkhan Police Out Post hawn hi 2020 December 7 khan Serkhan VCP hmingin sawrkarah dilna thehluh a ni a, chumi hnuah Serkhan to Bagha Road Joint VC-in sawrkar tharah dilna an thehlut leh a, kumin Febuary 16 khan Out Post dah remtihna notification chhuah a ni. Serkhan khuaa mimal in luahin bul an tan a, hmar tlangdunga khaw 6 – Serkhan, Lungdai, Lungmuat, Nisapui, North Chaltlang, Bukpui a huam ang. Sub inspector 1, head constable 1, constable 2 leh driver 1 an awm dawn a, lirthei dah nghal a ni.
Police lak turah ‘chak’ kan duh ‘No sir’ ti ngam officer kan nei: – Home minister
