Police officer-te orderly kawl mi 118 vel tihtlem sak dawn

Mizoram Police officer-ten orderly an kawl mi 118 vel chu sawrkarin a tihtlem sak dawn.
Mizoram Resource Mobilization Committee (MRMC) chu an chairman, chief minister Lalduhoma hoin Thawhlehni khan an thukhawm a. An thurel zingah, MRMC-in chief secretary leh Secretariat-a officer-ten household MR an kawl zat a lo tihtlem sak tawh a. Kumtin cheng vaibelchhe engemawzat an hum theih phah tih sawi a ni. Tunah hian Mizoram Police officer-ten orderly an kawl mi 118 vel pawh tihtlem leh tha an ti a. Sum leh pai senso a tlem phah dawn bakah Police department-a thawktu daihzai zawka semdarhna a ni nghal dawn tih sawi a ni.
Mipuiin sawrkar atanga service an dawn “Right to Public Services Act 2015” hnuaia service 197 tarlan chu a hun taka a hmangtu mipuiin an hman theihnan tun aia tha zawka vil nise, an ti.
Mizoramin ama puala High Court a neih theih dan tur an sawi a. MRMC Sub Committee on Administrative Reforms chuan 2025 May 27 khan a hranga High Court neih a lo rawt tawh bakah Mizoram Peace Accord 1986 bawhzuina a ni tel tih sawi a ni. Law & Judicial Department hotute nen pawh sawiho a ni tawh a. High Court dinna tur hmunhma a tha a, sawrkar sum senso a lo tlem phah dawn bakah Mizoram mipuiin an dikna chanvo awlsam zawka an chan theihna tura kawng sialna a ni tih a sawi a ni bawk.
Thutkhawmah hian MRMC vice chairman Haukhuma Hauzel, ministers pahnih – Lalrinpuii leh F Rodingliana bakah MRMC member-te an tel.
MRMC thukhawm thurel dangte:
8 Sawrkar kalphung fel leh chak zawk a awm theihnan district administration chak zawk din a pawimawh an ti a. DC office tihchakna atan district tina District Rural Development Office chu DC office-a Planning & Development Wing anga zawi zawia lehlin a tul nia ngaih a ni.
8 District tina Deputy Commissioner Office manpower tihchak an ngaih avangin sawrkar inrenchemna hrereng chungin thuam chak dan tur MRMC Administrative Reforms Sub-Committee-in lo ngaihtuah se, an ti.
8 Mizoram sawrkar hnuaia thawk doctor-ten an lak mek Non-Practicing Allowance (NPA) pawh ngaihtuah nawn a ni a. Doctor-ten NPA hi dik taka an lak theihnan ‘monitoring system’ changtlung tak siam an rawt.
8 Zuangtui Industrial Estate chhunga industrial plot dawngtuten a nihna ang taka an hman theih dan tur, balu leh lung atanga chhiah lak belh theihna, sawrkar inrelbawl dan tha zawk neih dan tur leh sum inrenchemna lam thil engemawzat an sawi bawk.