Mizoram tualchhunga football club te inelna lian leh ngaihhlut hlawh ber Mizoram Premier League (MPL) season 11 chu July ni 9, Thawhlehni chawhnu dar 12:30 khan RG Stadium-ah khelh tan a ni a. Season thara inkhel hmasa berah champion lai Mizoram Police FC an chak nghal. Inkhel dangah Chanmari FC an chak bawk.
MPL 11 a inkhel hmasa berah champion lai Mizoram Police FC hian MPL club thar Ramhlun Athletic FC an hmachhawn a, inkhel hmuhnawm takah 3-2 in hnehna an chang.
LZ Juice MPL 2024 match hmasa berah hian goal a lut hma hle a, minute li chhung lekin goal hnih a lut hman der. Inkhel tan atanga minute hnihna lekah Malsawmkima chuan MPFC hmahruaina goal a thun. Hma takah goal chhuah mah se Ramhlun Athletic FC an buai lova, R Lalchhantluanga chuan minute lina lekah goal thunin an si phurh a sut.
1-1 a nih hnuin MPFC an khel tha chhunzawm a, R Malsawmtluanga chuan minute 23-naah hma an hruai letna goal a thun. Ramhlun Athletic FC tan Felix Lalruatsanga’n minute 79-naah an si phurh sut bawk mah se MPFC tan F Lallawmkima chuan minute 90+3-ah an chakna goal a thun zui leh a, point thum an hmu zui ta a ni.
Thawhlehni a inkhel dangah Chanmari FC chuan an khingpui FC Bethlehem chu MS Dawngliana goal hnih thun hmangin an hneh, point thum an hmu ve bawk.
MPL 11 ah hian Mizote zingah mimal anga Juice Plant nei lian ber LZ Juice chu main sponsor an ni a. Hei vang hian LZ Juice MPL tih a ni.
Police team an chak nghal
