Pope Francis-a’n Same-Sex ngaihven

Pope Francis chuan same-sex union malsawm theih dan a awm thu conservative cardinals panga tena church teaching chungchanga an hnialna kaihhnawihah LGBTQ+Catholics meeting lian tham tak awm hmain a sawi.
Vatican chuan thawhtanni khan cardinals te hnenah July 11 a zawhna panga ‘dubia’ a dawn Francis chhanna ziah chu tihchhuah a ni a. Hetah hian Francis chuan malsawmna chu sacramental marriage nena ngaihhai theihna a awm lo a nih chuan zirchian ni se a ti a ni.
New Ways Ministry, LGBTQ+ Catholics te thlawptute chuan Pope Francis lehkhathawn ziah chu kohhrana LGBTQ+ Catholics te pawm tumna lama hmalakna lian tham tiin an sawi zui a ni.
Vatican chuan inneihna chu mipa leh hmeichhia inzawmna tihchhiat theih lohah a ngai a. Hei vang hian gay marriage chu hun rei tak a dodal tawh a ni. Mahse, Francis chuan same-sex nupa tena legal benefits an neih theih nana civil laws tihzauh chu a thlawp thung a, Europe hmun tam takah Vatican khakna tel lovin same-sex union blessing an lo pe tawh thin.
Francis-a’n cardinal te hnena chhanna a pek hi Vatican-in official a ngaihdan a neih nen chuan a inperhsan thung. Kum 2021 khan Congregation for the Doctrine of the Faith chuan chiang takin kohhran chuan mawngkawhur te inneihna a malsawm thei lova a chhan chu “Pathianin sual a malsawm thei lo” an ti thung.
A lehkhathawn tharah Francis chuan inneihna chu mipa leh hmeichhia pumkhata insiamna a ti a. Mahse, cardinal tena homosexual union leh malsawmna chungchanga zawhna an siamah, ‘pastoral charity’ chuan dawhtheihna leh hriatthiamna a nei tur a ni tia sawiin puithiamte chu judge ‘hnawl, bansan tu leh pawm duh lo’ an ni tur a ni lo a ti.
“Hei vang hian pastoral prudence chuan malsawmna awm thei te mi pakhat emaw pakhat aia tamin emaw an ngen chuan leh inneihna kaihhnawih ngaihhai theihna a awm lo a nih chuan an ngaihtuah a rem a ni,” tiin a sawi a.
“A chhan chu malsawmna chu ngenna a ni a, Pathian hnena ngenna niin nun tha zawk neih nana ngenna a ni a, pain nun tha zawk kan neih theih nana min puitu a ni,” tiin a sawi.
Thil thenkhatah erawh chuan ‘rilrua pawm theih loh’ thil a awm a ti a. Mahse ‘pastoral charity’ chuan mipuite chu sual angah ngai vekin mahse an dinhmun chu an sual reng vang leh tihsual vang a ni kher lovah an ngai thei tiin a sawi bawk a.
Francis chuan hetianga pastoral charity hi fixed norms emaw protocol anga siam turin diocese emaw bishop conference emaw mamawh a ni lo va case-by-case basin a ngaihtuah mai chi niin a chhan chu kohhran nun chu tih thin dan phung pangngai piaha kal a ni tiin a sawi bawk.
Francis DeBernardo, executive director of New Ways Ministry chuan Pope Francis inhawnna chu lawmawm a tih thu a sawi a.
“Pastoral ministers in same-gender couple te malsawm a remtih chuan kohhran chuan same-gender couple te ah hmangaihna thianghlim awmzia a pholang tihna a ni a, heng nupa inhmangaihna hi Pathian hmangaihna lanchhuahna a ni,” tiin a sawi.
“Heng pawmna te hi LGBTQ+ Catholics tena an beisei ang diak diak ni lo mahse intluktlanna a awm theih nana hmasawnna pawimawh tak a ni,” tiin a sawi bawk.
Heng Pope Francis hnena zawhna siamtute hi cardinal panga Europe, Asia leh Africa bakah America a awm te niin Francis chu mawngkawhur, women’s ordination, Pope thuneihna angah te dinna tichiang turin an ngen a ni.
Heng an ngenna te hi karthum synod neih tur hma ni hnihah an tichhuak a, Vaticana inhmuhkhawmnaah hian kohhrana LGBTQ+ Catholics te dinhmun tur an ngaihtuah ang.
Cardinals te hi Walter Brandmueller of Germany, Vatican historian hlui te; Raymond Burke of the United States, Francis-an head of the Vatican supreme court atanga a paih te; Juan Sandoval of Mexico, retired archbishop of Guadalajara; Robert Sarah of Guinea, retired head of the Vatican’s liturgy office; leh Joseph Zen, retired archbishop of Hong Kong te an ni.
Brandmueller leh Burke te hi kum 2016-a Francis-an inthen tawh leh civilly marriage couple tena Communion an dawn a remtih an duhlohna lantirna ‘dubia’ a hming ziah hnantute an ni.
Khami tum kha chuan Francis an chhanna a siam lo va, tunah erawh chhanna a siam ta thung a ni. Mahse, cardinals te chuan chhanna an dawnah an lawm tawk loh thu sawiin an thehlut nawn leh a, chhanna chu aw leh aih ringawta chhang mai turin an ti zui bawk.