World Cup 2026 khelh meka group match hnuhnung berah Portugal an chak zo lo. Colombia nen an inhnehtawka group champion an nih zawh loh vangin Portugal hmabak a hautak a, final lut turin kawng harsa tak an zawh a ngai dawn.
Champion tura rinkai leh player nei tha tak Portugal hian group match hnuhnung berah chak mamawh chungin Colombia an hmachhawn. Colombia lakah an chak a nih chuan Group K-ah champion an ni ang a, last 32 ah Ghana hmachhawnin quarter-final luh theihna kawng awlsam zawk an zawh ang. Colombia an hneh zo lo a nih erawh chun pahnihna ni chungin an tlang ang a, Croatia an hmachhawn zui a ngai dawn thung. South American khawmual team tha lakah chak tum viau mah se an chak zo lova, kawng harsa zawk an zawh zui a ngai dawn.
Group champion nih inchuha inkhel Colombia leh Portugal te inkhel hi a class a sangin, a hmuhnawm hle. Colombia in Portugal an ngam viau a, an tlarhnung paltlangin goal an thun teuh thei hle. Derhawng tak chungin him hram hram mah se Portugal in Colombia tlarhnung an paltlang hleithei meuh lo. Goal thun theihna hun an neih that ber chu Bruno Fernandes-a’n uiawm takin a hlah a, goal an thun thei lo tluan.
Ball chang tam leh hlauhawm siam tam zawk Colombia goal thun pawm a ni lova, an hun tha neih an chhawr tangkai thei bik lo bawk. Inkhel hmuhnawm takah hi goal awm lovin a tawp a. Colombia chu group champion niin an tlang a, Portugal chu pahnihna an ni.
Grouk K-ah an champion zawh loh vangin Portugal hian Europe a team lian zinga mi Croatia an hmachhawn zui dawn a. Croatia paltlanga last 16 an lut a nih pawhin Spain hmachhawn zui thei dinhmunah an ding. Spain hi an ngam khat viau a, last 32 leh last 16-ah khingpui hautak an nei nghal dawn. Last 16 an paltlang a nih pawhin final lut turin France emaw, Germany emaw zawk zawk an paltlang leh zet a ngai dawn bawk. Final kalkawng enin Portugal hmabak a hautak hle.
Portugal Hmabak a hautak
