ZPM a sawrkar a nih chuan kum 5 chhunga power-a intodelh hman tumin lui pathum khuah tum an nei tih an party consultant F Rodingliana chuan a sawi.
September 25, 2023 (Thawhtanni) a Ngopa Jubilee Hall-a ZPM 21st Lengteng A/C North Block Extended Meeting leh Policy zirhona buatsaih a hmanpuinaah Lengteng biala ZPM candidate tur ni bawk F Rodingliana chuan ZPM-in power-a intodelh a ngaipawimawh a, a kum tela power mamawhna a san zel avangin, Pathian leh mipui zara an sawrkar chuan kum 5 chhunga power a intodelh tura hma lak tum a ni tih a sawi.
Tlawng Hydro Project 54 MW, Lungleng khaw bulah din tum a ni tih sawiin, he tuikhuah hmang hian pump chhawn ngailo in PHE tui pump-na Dihmunzawl thleng gravity-in a haw thei a, heta tang hian pump hmangin Aizawl khawpui a thleng chho thei anga, hei hian sum tam tak a hum dawn tih a sawi.
Mw 120 pe thei tur Mat Sekawi, Rotlang khaw bulah leh MW 100 siam theihna Tuivai Phase-I chu Ngopa khaw bulah din theih a ni tih a sawi bawk.
“Tunah hian kan ram chhunga luite atangin power siam theihna MW 3663 chuang kan nei a, heti chung hian power ah kan intodelh lo em em a, power lei nan kumtin cheng vaibelchhe 389.93 vel kan hmang ral thin. Hei hi ZPM chuan tha ti lo in, kan ram chhunga luite hi power siamchhuahna atan a hmang turin hmalakna hmasaah kan nei dawn a ni,” F Rodingliana hian a ti.
ZPM a sawrkar hunah chuan electric bill chu a rate tih pun a ni dawn lo tih a sawi lawk bawk.
Mizoramin industry mumal kan la neilo chu hma lak a ngai tih ZPM consultant hian a sawi a. An sawrkar chuan agriculture leh horticulture hmangin industry din an tum a, sawhthing sawngbawlna leh Paper Mill thlenga din an tum thu sawiin, “Hengah hian mi tamtak tan eizawnna siam tum a ni,” a ti.
“Hetianga hma kan lak hunah chuan kalphung tharin kan kal tawh anga, tunhma anga MLA leh minister te chil per changa bial mipui awm thin na hi tih reh tum a ni,” a ti.
Power-a intodelhna atan Lui pathum kan khuap ang – ZPM consultant
