Power leina a hun taka an pek avang leh power lei tawh, hman zawh loh laia hmun danga hralh chhawn lehna atangin tun kum hnih chhungin cheng vaibelchhe 61 an hmulet tling tawh tih Power minister F Rodingliana chuan a sawi.
Dampa bial khaw hrang hrang tlawh kualtu Power & Electricity minister hian, power leina hi a hun takah an pek avangin rebate an dawng tha hle a, rebate leh trading atangin kum hnih chhungin cheng vbch. 61 chuang an hmulet tawh a. Kuminah hian Tuirini Hydel Project thar siamna tur a lungphum phum hman an tum a, Tuivai Hydel Project tur pawh DPR an peihfel tawh a, megawatt 102 pe chhuak thei turin Tlawng lui pawh DPR siam mek a ni tih a sawi.
Khawtlang hruaitute leh ZPM party mite nen inkawmhonaah F Rodingliana chuan, sawrkar hmalak mekna leh hmalak tum dan, Dampa bialin a chhawr ve theih tur tam tak a awm tih a sawi a. Power & Electricity department bikah kum 2024 khan electric transformer thar 59 lei niin, kuminah 100 chuang an lei tawh a. Rin aiin transformer thlak ngai a lo tam a, Finance department-ah a thar tam zawk lei an dil mek a, duh angin thil a kal thei diak diak loa, hma erawh an sawn tawh hle tih a sawi.
“Central-in transformer hlui thlakna tur cheng vaibelchhe 40 chuang Mizoram sawrkar pek min tum mek a, khaw hrang hrang mamawh zualpui chu a phuhruk kan beisei,” minister hian a ti.
ZPM chuan state budget mil tawk turin policy an duang a, an policy hlawhtlinna hmel pawh an hmu chho zel tih sawiin, “Party dang policy kha chu, mipuiin kan chhawr ve dawn chuan unit enrollmemt fee nena thleng a ngai thin a, ZPM sawrkarah chuan a thawkrimten an chhawr mek a ni,” a ti.
ZPM candidate Vanlalsailova pawhin an hotuten ZPM MLA neih lohnaah bial vil rih loh nise an ti chungin, bial chhung mipui mamawhnaah chuan sawrkarah theihtawp an chhuah zui ve zel tih a sawi a. An tling a nih chuan Pu Rintluanga sulhnu, a hmachhawp tihhlawhtling turin sawrkar development leh MLA fund nena tangkawpin Dampa bial tan hna an thawk dawn tih a sawi a ni.
Power rebate leh trading-ah kum hnih chhungin vbch. 60+ hmulet
