Mizorama Smart Metering Project thawktu tur contractor/ advance metering infrastructure service provider (AMISP) leh Power & Electricity department chuan Ningani khan Power minister F Rodingliana hriatpuiin inremna thuthlung (agreement) an ziak.
Sawrkar laipui Ministry of Power hmalakna in India ram pumah electric power distribution tihchangtlunna tur Revamped Distribution Sector Scheme (RDSS) hnuaiah smart metering project hi thawh tur niin, India state tam zawka kalpui tawh chu Mizoramah bul tan a ni ve dawn a ni.
Smart metering hi pre-paid mode-a kalpui tur a ni a, a hna hi TOTEX mode-a thawh tur a ni ang. Chumi awmzia chu, contractor /AMISP hian anmahni sum sengin engkim an thawk ang a, meter a tha ngei (go-live) tih a chian atanga thla khatna atangin consumer-te smart meter service charge hi department-ah thla 93 chhung bill an thehlut ve thung ang. Sawrkar laipuiin meter man (benchmark price) atanga zaa 22.5 a tum sak dawn avangin thla tina AMISP-in a bill tur hi a su hek nual dawn tih sawi a ni.
Smart metering hi hlawhtling taka hman theih a nih hunah chuan tuna P&E department-a meter reader engemawzat chuan hna tul dang an thawk thei dawn tih department hotute chuan an sawi a. Thawktu indaihlohna nasa taka sutkianna hmanrua leh sum renchemna tangkai tak a ni dawn tih an sawi.
He project hi a lianthamin, thil thar a nih bawk avangin a thawktu tur pawh duh ang ang hmuh theih a ni ngawt lo tih an sawi a. Mizoram mipuiin ram hmasawnna tur hna pawimawh tak thawktute chu a tul hun apianga lo tanpui a, chak zawka hna thawh a nih theihnan tha taka thawhpui theuh turin mipui an ngen tih a sawi a ni.
Smart metering scheme atanga hlawkna awm thei te:
8 Mipuiin eng kan chhit man hi pek lawk (pre-paid) vek tawh tur a nih dawn avangin collection efficiency hi zaah za a ni thei tawh dawn a, electric bill ba a awm tawh dawn loh avangin thla tina bill hmuh a pung thei dawn a ni.
8 Bill siam sual, bill sem tlai leh reading lak mumal loh a awm tawh lo ang.
8 Online-a bill pek tur a ni dawn a, duh hun hunah consumer-ten an pe thei tawh ang. Thla tawpa a hlawma bill pek ngai tawh loin mi-in a mamawh ang tawk zelin duh zat zat thla khat chhungin a top up thei anga, a duh zawk chuan thla 2/3 tan pawh a pe lawk thei dawn a ni.
8 He hna thawktu tur thlanna hi e-tender tihchhuah niin, open competitive bidding hmanga thlan a ni. Tuna contractor thlan tak hi kumin October 14-ah letter of award (LoA) pek niin, November 21 khan contract agreement ziah a ni.
8 Smart meter installation hna hi LoA pek atanga thla 27 chhunga zawh tur a ni a, an zawh atanga thla 93 chhung an enkawl zui ang.
8 Contract agreement ziahah hian Mizorama consumer 289383 tan pre-paid smart meter vuah sak, distribution transformer 2300-a smart meter vuah leh 11kV feeder 398 atana smart meter vuah a kengtel
Power smart meter vuah tan dawn
