Video assistant referees (VAR) hian sawisel a hlawh chho ve reng a, chuvangin Premier League chuan kum 2019 atanga an hman tan VAR chu hman loh leh mai tur em ni ang tiin vote hmangin an buk a, English top flight club 20 zinga 19-in season thara hman chhunzawm an duh a, duh lo zawnga vote pe club pakhat chiah an awm.
Kumin May thlaa Premier League hnena resolution thehluta video assistant referees hman chhunzawm chungchang ennawn duhna thlentu Wolves chu vote thlakah hian an maltan a, 2024-25 season-ah match referee leh a puitute chian loh thil pui turin VAR an ruai chhunzawm leh dawn ta a ni.
VAR titawp tur hian Premier League 20 zinga 14 talin duh lo lama an phar a ngai a, mahse, Wolves chauhin hman chhunzawm tawh loh lama vote an thlak tak avangin an duhdan a tlang zo ta lo a, thuchhuah an siamah vote tlak dan an hmuhin an lung ni lo hle tih an tarlang a, chutih rualin Premier League-in VAR hnathawh dan ennawna siamthat leh rintlak zawka duanchhuah an tumna erawh tha an tih thu an sawi.
2019-20 season atanga hman tan a nih hnu khan Premier League hian VAR tihhmasawn kawngah nawrna a tawk chho reng a, tunhnaia an thutkhawmah kumin favang atang hian semi-automated offsides an tih chu hmun thenkhata hman tan turin an pass nghe nghe.
2023 women’s World Cup laia an tih ang khan Premier League-ah pawh inkhelh laiin stadium chhunga aurinna kaltlangin referee-te chuan VAR thutlukna chungchang sawifiahna (in-game VAR announcements) an tichhuak tawh thin dawn a, chumi awmzia chu stadium chhunga inkhel entute hnenah VAR thutlukna an hrilhfiah thin dawn a ni.
Premier League club-te’n VAR hman zel an duh
