Pro Fight final khel turte chu…
LPS Arena, Falkland Venga Tata SK 612 LPS Pro Fight semi-final chu karliamta Inrinni khan khelh zawh niin, zan 26-na last four inhnek chanchin thlir teh ang.
MIDDLEWEIGHT
F. Lalthanliana Junior (Lunglei Electric Veng) bt Daniel Beipasasa (Siaha)
= Unanimous Decision (40-36, 39-37, 39-37)
Kum 23 mi Thanliana’n fiahna hmasa paltlangin unanimous decision-in Siaha boxer Daniel Beipasasa a hneh a, Pro Fight-a a tel hmasak berah final lutin, rin hlawh Chawngtlai fighter C. Lalhruaitluanga nen middleweight title an inchuh dawn.
Lunglei Electric Veng tlangval hian a vei leh ding mar taka a chhuah zawn thin hmangin Beipasasa a tibuai a, lehlam inthlahdah laia a hnek fuh a langsar. Inhnek tawnah a kutchhuak a dak zawk a, round hmasa pahnihah a lawr.
Round thumnaah kum 21 mi Beipasasa chuan nung takin bul a tan a, hnek chhuak zawnin engemawchen a nawr hneh. Thanliana insiamremin a ngila a hnek fuh hnuah a ding leh veiin a hnek fuh zawn zui bawk.
Round hnuhnung berah Siaha boxer thahrui a tlahniam a, thiamna nei chi hrang hmang tha zawk Thanliana’n a hnuai leh chungah fuh taka a hnek zawn thin bakah chiang taka hnek fuh a nei fo a, judge pathum point pekah 40-36, 39-37, 39-37-in a chak.
Kum tir khan Lunglei Electric Veng boxer hi Mizoram Fight Night lightheavy-ah a champion a, kum khat chhungin Mizoram boxing title hraw pahnih hnek chhuak thei turin hun tha a insiam.
November ni 10, Zirtawpni zan middleweight title fight-ah 2022 Pro Fight welter champion Hruaia nen an intawng dawn a, boxrec-a ziahluh tur a nih avangin professional a luhchilh nghal dawn tihna a ni.
Beipasasa a hneh hnuah Thanliana’n, “Ka duh ang takin ka khel chiah lo a, final-ah chuan a dik vek ang,” a ti a, ani aia tun dinhmuna langsar zawk Hruaia a huphurh loh thu a sawi bawk.
WELTERWEIGHT
Vanlalruatpuia (Saikhamakawn) bt C Remruatsanga (Khawhai)
= Technical Knockout (Round 2, 1:18 min)
Kum 19 mi Ruatpuia’n round hnihnaah a hman thiam a vei lamin C. Remruatsanga a hnek tlawm a, November ni 11, Inrinni zanah Mission Veng boxer Lalruatzela Hauzel nen welterweight title fight-ah an innuai zui dawn.
Tawnhriat nei lo huang atanga semi-final lut Ruatsanga’n tawnhriat leh thiamna kawng hrang hrangah amah aia kum hniha naupang Ruatpuia a pha lo vek a, round khatna laihawl atangin a inveng nasa.
Kut rang leh chet zung zung awlsam zawk Saikhamakawn rawltharin nuam ti takin a hnek a, a ding lama a hnek fuh hnuah a veiin a vai zawn a, Khawhai tlangvalin a veng hneh lo.
Round hnihnaah chiang tak tak a hnek hnuah a vei lama a vai fuh rualin Ruatsanga chiaiin a thingthi a, referee Malsawmsanga’n chhiarin a tho leh na a, an inthlauh em avangin minute 1:18-ah inhnek a titawp.
Kum 2019 khan Ruatpuia’n round of 16 a lut tawh a, Pro Fight-a a tel vawihnihnaah final lutin, “Ka khelh danah ka lungawi tawk hle a, ka taksain 100% pha lo deuh mah se ka lawm takzet a, final-ah pawh ka chak ngei ang,” a ti.
BANTAMWEIGHT
Ramdinthara (Pangzawl) bt Omega Lalramdina (Dinthar)
= Unanimous Decision (39-36, 39-36, 39-36)
Pangzawl fighter Ramdina’n round khatnaah Omega a hnek tlu a, lehlamin nawrlet tuma a beihna dang hneh zuiin unanimous decision-in a chak.
A hnek thui hlauhawm tak leh hmun chepa rang taka hnek zawn thei a nihna a dinchanpui leh a, November ni 10, Zirtawpni zan bantam title fight-ah tunlai Mizo boxer tha ber pawl Laldinsanga nen an intawng dawn.
An inhnek hmain kum 20 mi Ramdina’n rin a hlawh lo zawk a, chutih laiin kum 21 mi Omega nen nikum Pro Fight round of 16 atangin tla ve ve mah se Dinthar boxer-in chawl loin a bei a, professional luhchilh zuiin, vawihnih a khelh tawhah a chak ve ve a, a vanglai a hmang mek.
Kickboxer Ramdina’n a khelh dan pangngaiin a vei leh ding a chhuah zawn hnuah a ralthuam hlauhawmin a um zui a, a ding lam thui leh na takin a vai chhuak. A tir lamah Omega chuan a veng thei viau a, awm hmunah tha tak taka a hneklet bakah ngampa taka panin a nawr fo bawk.
Round khatna tawp dawnah Omega chuan langsar takin a hnek fuh zawn a, a um zui laiin Ramdina’n rang leh na takin a lo hneklet a, Dinthar boxer talbuaiin a tlu a, tho leh nghal mah se referee Malsawmsanga’n chhiarin a pawi zui hle.
Chhiar ngaia hnek tlutuin 10-8-in round a la lo thei lo a, round thum la awmah chak turin Omega tan lak vek a ngai. A khelh danah lehlam knockout tura nawr chiam chi a ni lo a, a ban phak atanga dik taka hnekchhuak zauh zauh thin leh vawihnih thum hnek zawn bakah a theihnain tawp chin a nei bawk.
Round hnihna atangin Omega chuan a khelh dan thin tidanglamin dinhmun him lo takin a awm tluan a, hnek tluk ve tumin a nawr hnem. Hnek dan chi hrang tha tak tak lantir mah se nghet taka ding chungin Ramdina’n fuh leh chiang takin a hnek fuh lo a, inhnaih chilah kut rang leh hnekchhuah awlsam zawk a ni tel.
A tawpah phu takin judge pathumin 39-36 vekin Pangzawl tlangval an chaktir a, GIG Motors Fighter of the Night lawmman a dawng. Boxing khel tura a inbuatsaihna tha tawk lo mah se a hmabak hlen zel turin inrintawkna a nei tih a sawi a, title fight-a a inlan rualin professional boxing a luhchilh dawn.
Ramdina chuan nikum Pro Fight best boxer Dinsanga lakah chetpui viau a tum tih sawiin, “Ka lawm hle a ni. Huphurh ka nei lo. Ka khel chu hmuhnawm tak a nih loh pawhin a rapthlak hle ang,” a ti.
FLYWEIGHT
Vanlalenkawltira (Champhai Dinthar) bt Lalmuankima (Mamit Bazar Veng)
= Unanimous Decision (40-36, 40-36, 40-36)
Kum 20 mi Enkawla’n thiamna hmangin inhnek a thunun tluan a, Mamit Bazar Veng rawlthar Muankima lakah round li la fai vek chungin a vawikhatna’n final a lut a, November ni 11, Inrinni zanah vawinga champion tawh NT Lalbiakkima nen Pro Fight title an inchuh dawn.
Champhai Dinthar tlangval hian amah aia kum hnih a naupang lakah tawnhriat leh thiamna nei zawk a nihzia chiang takin a lantir a; inveng chunga amah pantu Muankima kut karah hnek tlangin, nalh takin a dawm fo bawk a, round khatnaah Mamit Bazar Veng rawltharin hnar thi nghalin a hnek ve mang lo.
Round hnihna atangin a hma aiin hnek chhuak tam mah se a ngila vei leh ding a chhuah zawn bakah a kal thui tam lo. Enkawla’n insawn kual pahin chi hrang hrangin a hneklet a, chiang taka vawithum hnek zawn chang a nei bawk a, a tawp thlengin an inbeih danah danglam a awm lo.
Mamit Bazar Vengah screen lianin an veng mipuiin a inhnek lai an lo en tih Muankima’n a hria a, thahrui fei tak nen bei mah se chet a harsat tluan a; amah thlawptute hnenah lawmthu sawiin, Pro Fight-a a tel vawikhatnaa semi-final a thleng thei chu thil lawmawm tak a nihzia a sawi bawk.
Enkawla’n, “Ka inbuatsaih angin ka khel tha niin ka hria. Kum 2015 atangin boxing ka khel ve tan a, hetih lai hian Pro Fight-ah a vawihnihna’n Biakkima a champion a, anni nen kan inkhel thei tur hi ka lawm khawp mai,” a ti.
LIGHTWEIGHT
HC Lalramfela (Chawngtlai) bt Lalmuanpuia (Lunglei Luangmual)
= Unanimous Decision (39-37, 40-36, 40-36)
Kum 28 mi Ramfela’n a kut ding lam hmang tha thei lo chungin Muanpuia a hneh a; inhnek boruak thununin judge pathum point pekah 39-37, 40-36, 40-36-in a chak.
A vawihnihna’na Pro Fight champion ni turin tum khat chak a la mamawh a, November ni 11, Inrinni zanah Cherhlun boxer C. Lalhruaitluanga nen an innuai ang.
Kum 2015 bantam champion Ramfela’n a khelhna sawn tawhin nikum khan light title fight-ah Vanlalawmpuia a hneh lo a, kuminah champion tumin a kirleh a, quarter-final-ah mittlung takin Lalbiakzuala knockout mah se Muanpuia laka a chet danin beisei a pha lo.
A tir atangin fimkhur dun takin an inep a, Ramfela’n dawm fuh a neih bakah a hnek tlang zauh zauh a; ani aia inveng nasa kum 21 mi Lunglei Luangmual boxer-in rilru lamah a ngam tawk lo a, awmze neia hnek a nei tlem hle.
Chawngtlai tlangvalin a vei lama a vai hnem bakah a hmang nasa a, lehlam inthlahdah laiin chiang taka a hnek bak langsara fuh a nei tam lo. Chutih laiin Muanpuia’n hnek fuh a harsat a, a taksaah hneksakin a ding ngilin a tum ram a thlen chang a awm ve bawk.
Round hnuhnung berah lang thamin Ramfela’n a nuai a, a vei leh ding chhuah zawnin a nawr.
Hneklet loin Muanpuia a inveng ringawt a, engemawchen hnuah talchhuakin tluk pumpelhin a tawp a thleng a, nikum ang bawkin semi-final a paltlang zo lo.
Ramfela chuan, “Kan inhnek hmain ka ban ding lam ka tina a, round hnihna atangin ka hmang thei tawh lo a,” tiin harsatna a neih thu a sawi a, Title Fight-ah inpeih zawk inlan ngei a inbeisei a, “Huphurh neiin boxing ka khel ngai lo a, ka hmaah tu pawh ding se nuam ti takin ka khel thin,” a ti.