Nizanah TATA SK 612 LPS Pro Fight semi-final zan hmasa zawk kan thlirliam a, zanin hian last four inhnek vawinga bawk awm lehin, final lut tur an chiang kim tawh ang. Zanin inhnek tur thlirkual leh thuak thuak ila.
MIDDLEWEIGHT – Round 4
Daniel Beipasasa (Siaha)
vs F Lalthanliana Junior (Lunglei Electric Veng)
Kumin kumtir lam daih tawh khan kum 21 mi Bepasasa chuan Mizoram Fight Night-ah semi-final a lut a, a vawikhatna’n Pro Fight-ah tel zuiin, tum hnih a chak tawh na a, tun hi tunge a nih mipuiin an hriat theihna tur a ni dawn. A inhnek tawhah a theihna lantir khawp a la tawng lo a, championship tan hmaa ani aia rin hlawh a tawng dawn.
Mizoram Fight Night light heavy-ah kum 23 mi Thanliana a champion ve thung.
Pro Fight-a a tel vawikhatnaah quarter-final a lut nghal a, rei a inhnek hmain a bitum a inhnukdawk. Bepasasa ang thoin tun inhnek hi Pro Fight-a hriatchian a hlawhna hmasa a ni dawn a, a tan a pawimawh.
WELTERWEIGHT – Round 4
C. Remruatsanga (Khawhai) vs Vanlalruatpuia (Saikhamakawn)
Tawnhriat nei lo huang atangin kum 21 mi Ruatsanga’n semi-final a lut a, chhuan tham tak a ni tawh. A kalkawngah thahrui ngah, fei leh tlo a nihzia a lantir a, thiamna lamah seeded zinga mi Samson Vanlalngaihawma tluk lo mah se chhel leh rim takin hnehna a sualchhuak thin a; thahrum leh thahrui hmachhuanin rin hlawh zinga mi Ruatpuia a hmachhawn leh dawn.
Naupan tet atanga boxing khel tawh leh National School Games champion ni tawh kum 19 mi Ruatpuia’n vawithum hnehna chang tawhin, harsa lo takin a chak zel a, an tawnhriat khaikhinin Ruatsanga lakah awlsam taka chak leh mai tura ngaih theih a ni. Chutih laiin zuam sual theih a ni a, quarter-final lamah khan Lalhruaisanga lakah inhnek thunun hle chungin hnek tluk tumin a bei nasa a, a puitlin theih loh rualin a hmaa a khelh dan aiin a tlakhniam phah.
BANTAMWEIGHT – Round 4
Ramdinthara (Pangzawl) vs Omega Lalramdina (Dinthar)
Kickboxer, kum 20 mi Ramdina’n nikum khan boxing luhchilh telin Pro Fight round of 16 a thleng. Pianpui talent tha tak a neih tuaihnum lehzualin, a hnek a thuiin a hmang thiam a, rang taka hnek zawn a awlsam bawk a, boxer tha tia hriat a hlawh theihna’n hmabak hlen tur a ngah tawh lo.
Tunhnaiah kum 21 mi Omega hian hma a sawn a, a bitum tur Pangzawl fighter ang bawkin 2022 Pro Fight round of 16-ah mah se nasa lehzualin boxing a luhchilh a, professional vawihnih a khelh tawhah a la chak ve ve. |uan rang leh che zung zung chi ni lo mah se awm hmun siamrem pahin dik tak takin a hnekchhuak thin a, zuam sual awl tak a ni.
FLYWEIGHT – Round 4
Lalmuankima (Mamit Bazar Veng) vs Vanlalenkawltira (Champhai Dinthar)
Kum 18 mi Muankima’n 2022 Northest Championship-ah silver medal a hnek chhuak a, Pro Fight-a a tel vawikhatna ni mah se tlangnel leh ngampa takin a bitum apiang a hmachhawn a, a vei leh ding rang leh tlang tha tak bakah thahrui fei leh hnek chhuak tam thei a nihna a dinchanpui zel.
Kum 20 mi Enkawla’n quarter-final-ah thiamna nei sang tak Hming-thanmawia a hneh rualin rin a hlawh phah a, a beihte lakah inveng zawk ni loin a nawrtu a ni zel. Tharum leh thahrui a neih that bakah thiamna hman tlak a nei tel a, bantam-ah nikum quarter-final lama a hneh loh Laldinsanga a insawn avangin a tan zau zawkin kawng a inhawn phah mai thei ?
LIGHTWEIGHT – Round 4
Lalmuanpuia (Lunglei Luangmual) vs HC Lalramfela (Chawngtlai)
Kum 21 mi Muanpuia’n rahbi thar tuk turin vawikhat chak a la mamawh. Nikum khan feather semi-fina stagel-ah a tla a, kuminah light-ah chona thar hmachhawn mekin, a hmabak hautak dawn mah se quarter-final lamah khan chakpui tham thahrui fei a nei tih tharum ngah Van-zairemmawia lakah a lantir a, thiamna a entir tel bawk.
Kum 2015 Pro Fight bantamweight champion Ramfela’n rin a hlawh a, nikum light final-a a hneh loh Vanlalawmpuia’n WBC India title a chuh dawn avangin kumin Pro Fight-ah a tel lo.
Weight hrang pahniha champion ni turin Chawngtlai fighter-in tum hnih chak zawn a la mamawh a; a round hmasa lamh kuttum hlauhawm a nihzia Lalbiakzuala lakah lantirin vawithum a hnek tlu zo chiah a; chutih rualin tawnhriat leh thiamna nei tel a hmachhawn dawn.