Mizorama Volleyball inelna ngaihhlut hlawh ber Pro-Volleyball League tana thawhhlawk; mimal chawimawina tumsak thintu KT Enterprise chu kum 2026 atan an inhnukdawk a, D3 Business Enterprise Haier Home Appliances chuan Mizoram Rural Bank Pro Volleyball League Mizo Best Player leh mi mal che thate hnenah lawmman tha tak a pe dawn.
Pro Volleyball vawi hnihna 2017 atangin KT Enterprise, Ramhlun North, Aizawl chuan 2025 thlengin tum sarih a zawnin Mizoram volleyball inelna sang bera mi mal lawman a tumsak a; chawimawina hlu ber Mizoram Best Player hnenah thil hlu tham tak, television emaw refrigerator emaw washing machine emaw leh memento pein mi mal chawimawina dangah pawisa fai leh memento pek thin a ni bawk.
KT Enterprise hi chhan eng emaw vangin kum 2026 chhung atan an inhnukdawk a, inelna neih leh hun atan indawr thar leh turin an inhuam viau thung. Pro Volleyball League chuan KT Enterprise ten Mizoram volleyball leh player-te tana an inpekna ropui a ti a, thawh hona tha tak nei chunga vawi sarih a zawna mi mal lawmman tumsaktu a nih tawhnaah lawmthu a sawi a ni.
Pro Volleyball League sponsor-tu zinga mi D3 Business Enterprise chuan Mizoram Rural Bank Pro Volleyball League-a mi mal chawimawina a tum ve thung dawn. Euromonitor-in International Survey a neih atanga home appliances hmangtuten kum 16 a zawna khawvela rin tlak bera an thlan Haier chuan Mizo Best Player hnenah lawmman tha tak a pek dawn bakah mi mal chawimawina dang a tum dawn a ni.
Mizoram Volleyball inelna sang berah hian Mizo Best Player nen mi mal chawimawina chi hrang 10, mipa lamah paruk leh hmeichhe lamah pali sem chhuah thin a ni.
Kum 2017 atangin TNT superstar Vanlaltanchhana’n vawi thum (2022, 2023, 2025) Mizo Best Player award a la tawh a, Hunthara khel mek Lalbiakmuana’n vawi hnih (2017 Hunthar, 2019 Durtlang North), vawi khat ve ve Ramnunfela (2018 TNT) leh Fabian Lallunghnema (Hunthar 2024) ten an dawng tawh bawk.
Pro Volleyball-ah KT Enterprise thlaktu tur Haier
