Aizawl Municipal Corporation (AMC) chuan in sak phal lohna hmun (protected area) a in sa lui Lalramsanga chu a in sak thiat turin a hriattir a. Dan zawm loa in sa leh lei lai nia hriat ho chungah pawh hma a la mek.Aizawl Municipal commissioner Er Lalhriatpuia chuan kumin January 31 khan in thiat tura hriattirna (demolition order) tichhuakin, in sak phal lohna hmuna sawrkarin a puan, Bawngkawn – Durtlang Road a in sa lui Lalramsanga hi a in sak thiat nghal turin a hriattir a. Demolition order-ah hian kumin March 29 hmaa a in thiat zo tura tih a ni. Thupek a zawm loh chuan AMC-in a thiah sak theih thu leh, a thiah man senso chu in sa tu hian dan anga a chawi a ngaih tur thu hriattir a ni bawk.
2023 July 12 khan Lalramsanga hi phalna nei loa protected area-a in a sak chhan sawifiah tura tih a lo ni tawh a, a insawifiahna hi AMC chuan thutlingah a pawm sak lo. A in thiah a nih loh chhan tur sawifiah turin October 25 khan show cause notice pek a ni leh a, notice hi a chhang lo a ni.
Bawngkawn – Durtlang Road a protected area hi Aizawl Master Plan Vision- 2030 anga puan a ni a. Aizawl khawpui hi chenna nuam taka siam tur leh kan in leh lo a him zawkna tura AMC hmalakna hi khauh taka kenkawh zel tum a ni tih AMC hotute chuan an sawi a. Dan loa lei lai leh in sa mek nia langte pawh endik zelin an chungthu ngaihtuah tum a ni tih an sawi.
Aizawl khawpuia cheng mi tam zawkin dan zawmah hma kan sawnin AMC Building Regulations an ngaihpawimawh viau a. A bawhchhia pawhin AMC hmalakna hriattir an nihin an ngaipawimawh thiam sawt hle a, in thiah then ngaite pawh an thiat mai thin tih AMC hotute hian an sawi a. Dan zawm tum lo emaw nachang la hre lo mi tlemte la awm pawh Building Regulations hi khawpui him zawknan leh a nawm zawknan ngaipawimawh thar turin an chah tih an sawi a ni.
Protected area-a in satu AMC-in thiat turin a ti
