PSG talbuai zana chak Juve
Nilaini zanah champion lai Paris St Germain chuan season kal laia a vawi katna atan goal lut lo draw an hlawhchhuak a, Athletic Bilbao khelmual atanga point khat bak an hawn zawh loh laiin Juventus chuan sihnih faiin an mikhual hriat tham mang loh Pafos lakah 2-0 hnehna an chang.
PSG 0-0 Athletic Bilbao
Estadio de San Mames chhunga mipui 51,772 zet pungkhawm hmaah European champion Paris St-Germain hian Athletic Club tlarhnung paltlang zo loin point hnih hloh then bawk mah se play-off khelh buai ngai loa Champions League last-16 (knock out round) lut turin dinhmun tha pangngai an la luah chhunzawm tho.
Luis Enrique team khan khelh ruk atanga point 13 hmu tawhin, 36-team league table-ah pathumna an luah a; Athletic erawh point nga lek la hum chungin 28-naah an awm a, an him lo chhunzawm zel thung.
PSG khan San Mames inkhel an thunun ngei a, clear chance pawh an nei nual a, mahse, home keeper Unai Simon an pel zo lo tluanchhuak!
Fabian Ruiz chuan chance tha zet zet tum hnih nei mah se goal kham chungah a thlawhchhuak a; Simon chuan Senny Mayulu goal tur a dansak bawk.
He inkhela ‘best chance’ kan hmuh chu goal lam hawia ball a umluh hnua goal kham fuha Bradley Barcola chhuih kha a ni.
Hun tawp dawnah Ruiz chuan PSG chakna goal ni thei mai tura ngaih a thun teuh leh hle a, hei pawh hi a Spain team-mate Simon chuan dangin, line atangin Yuri Berchiche chuan hmunhimah a thawn chhuak zui thung.
Mualneitu Bilbao khan tum khat chiah goal zawnah ball an thawnlut a, chu chu hun tawp dawna Asier Hierro ‘shot’ niin, La Liga club hian point hnihin knockout phase play-off khelh phakna hmun an la thleng zo lo.
PSG hian Sporting an luhkhung leh dawn a; Atalanta mualah Bilbao an lut thung ang.
Juventus 2-0 Pafos
Nilaini Uefa Champions League – league stage inkhel dangah chuan second half-a an goal hnih sualchhuah hmangin Cypriot club Pafos an hneh a, a zawnin Champions League match hnih an chak a., last 16 lut turin an chance a tha chhunzawm zel.
Allianz Stadium-a mipui 40,336 fuankhawm hmaah mikhual lamin first half chhungin goal thun theihna hun remchang an hmu hmasa zawk a, Juventus an vannei a, Andrea Cambiaso chuan an lam goal hawiin ball a kuaipeng zuk pek a, an goalkeeper Michele di Gregorio chuan a loi dang thei hram a, chuti ni lo se Turin club kha an khelmuala si phur hmasa thei reng an ni!
A tum khatna atana domestic title an lak hnuah vawi khatna atan bawk Champions League campaign-ah Pafos an inlan a, league stage thleng tur khan qualifying match ruk zet an khel a, Serie A giants Juve tihte nen ruam khatah an inumkawi ta zar zar a ni!
Kum 1985-a European Cup an chawi hnua kum 1996-a Champions League trophy hawn leh Juventus hi tualchhung football lamah an talbuai mek a, Serie A table-ah pasarihna ni pha chauhin, hmahruaitu AC Milan leh reigning champion Napoli lakah point riat ngawtin an hniam tawh a, chuti ang dinhmuna an din laia Europe hnehna an chang leh ta kha boss Luciano Spalletti tan a lawmawm duh ngawt ang!
Turin club hian point kua nen Champions League table-ah 17-na an luah a; an hmabak la awmah Benfica mikhualin, Monaco an luhkhung zui leh ang.
PSG talbuai zana chak Juve
