Subrosa
Pu Duha hi amah ngawr ngawr chauh ni lovin, a kaihhruai ZPM Party leh Sorkar pawh kan enchhin dawn ta! Amah enchhin a tul tluan zak dawn tho tho.
Chutiangin ZPM Party pawh party thar, la sorkar ve ngai hauh lo, “Kalphung thar, Mipui Sorkar” thupui bera neih an ni a, an sorkar phah ber Mipui Sorkar chu kan enchhin tluan ve nghal reng tho dawn.
December 8, 2023-a ni 100 chhunga an thil tih tur Point 12-te chu a tha lutuk mah mah tih hial tlak a ni. Mizoram Sorkar sum dinhmun a chhe lulai êm a, inrenchem (Austerity Measure) te hi a tha thlawt mai. Chutih rualin State Health Care Bill leiba tâng VBC 40 zet MNF Sorkar bat, an SEDP sum bang hman a ni kher mai pawh tunge lawm lo awm ang a fak lo awm ang? Mahse maw, Party kalphung thar bawhchhiatna hmasa ber. CM chuan a department a chan loh theih loh (a) Cabinet Affairs (b) Vigilance (c)Political Affairs tih bak la ve lova Sorkar pumpui vilpuia puih ngai puia zilh leh hruai ngaite dawm khawm hna pui a thawk tura duh kha Finance leh General Administration Department-te a han la leh nghal hi bawhchhiatna hi a ni tlat mai. Kan hun tawn mekin azira kal dan thiam i ti rih phawt ang u.
Rilru leh ngaihdan te ziak chhin tan ve chauh ka ni a, ziak chhin leh enchhin a rual titih a nih hi. Sorkar liam tawh, Congress leh MNF hruaitute sel ve kher ka duh lo. Kan chungah fair tawk lova ngaihna nei tan pawh ni se (avoid flogging the dead horse) kan ti chhin a nih hi! Lengpui Airport te, Bairabi Railway tuna Sairang thlen pui thuai tur te, Tuirial Hydel Project te, Vankal Solar Energy Project leh a dang neuh neuh te hi an theih tawk ropui ka lo tih ve te an ni.
Kan enchhin theuh fo tawh titu te awmhmuna ka lo chhan sak ve fo dan chu “A la sorkar ve ngai lo, Sorkar lova inenchhinna chu, chhan hrang hrang vanga zuang lawr tih ngei theihna tura hruaitu a lo nih tawhna hi a awm ve nual reng a ni lawm ni? Indian National Congress, Congress for Democracy, Mizo Union, Mizo National Union, Democratic Party nial nual, Janata nial nual, MNF, MNF (N), ZNP, Tunah ZPM dinchhuah pui tu!!
Pu Duha hi Indian Police Service Regular Recruit ngat asin. Mizo Tlangval a luh rualpui Lalrokima Pachuau hi Zoram DGP, State lian tak Karnataka DGP nia pension. Ani Pu Duha ve chu IPS Senior Scale-a kum 3 vel chauh awm a politik zui ta char char, inthlan vawi 14 chuha vawi 8 tla asin.
Inpe zo si, fel si, taima si, thusawi thiam si, thil thiam chak leh kohhran rawngbawlna lam pawha kal tluang tak mai si hian engatinge politika a dinchhuah loh theih loh tlat, thil eng nge a tlakchham tih te pawh kan la sawi thei em ang. “A overall” enchhin zelin, a kal politik lutuk ta em ni. Inrenchem tih ruala SAI VAR khawi chho ve duah chi em maw a nih dawn le. Ni 30 êm pawh a ral hma (Ka ziak lai hian) a Delhi zuk zin teh chung pawh Ram Mandira chal rang khawp chuan a zuk intuk lo turah i ngai rih ang. Vuak dup a ngai lo. Aw Zoram Ka hmangaih che Pu Thanga (RIP) te nen i ti rih zawk ang. CAA/UCC te lek phei chu ser nung suh se.