K. Hmingthankaia
Pangpar leh thing hnah mawi takte pawh hi an duh duh dana an than a, an duh duh dana an chawr kual vel mai mai hi chuan an mawi tur angin an mawi zo thin lova, an mawi loh phah zawk fo thin a ni. Chuvangin, enkawltu leh thununtu an mamawh a. An lo mawi lehzual theih nan chuan an zar leh an hnahte chu cut then leh thunun te pawh an lo ngai ve fo thin a ni. Mihringte pawh hi kan induat lutuk emaw, kan infak lutuk fo leh kan inchawimawi lutuk fo hi chuan awm chin tawk hi kan lo hre lo hma thei thin khawp mai hi a lo ni a.
Chuvangin, mimal leh pawl hrang hrangte leh sawrkar ngei pawh hian kan tha ber, kan fel ber, kan dik ber, kan huai ber, thil kan ti thei ber, miin min ngai pawimawh ber, min hlau ber, min fak ber, min duh ber emaw inti tlat chunga ka theih tak emaw tia kan khawsak fo mai hi chuan, kan chhiat hi a lo hnai hle tawh a ni tih hi hriat a, mahni kan inenfiah fova, keimah leh kan pawlah hian khawilai hi nge cut then ngai, khawilai hi nge thunun ngai tihte hi inenfiah a lo tul hle tawh thin a ni. Min zilhtu leh min khaktu, min thununtu hi kan lo mamawh tawh hle a ni tih hi hriat nachang hriat hi a tha thin khawp mai.
City bus ho an stand-a an din rei thin lutuk chungchangah Home Minister hmu turin ni 10.9.2026 khan a office-ah ka leng a. Mahse, ka thu sawi hmasak ber chu, ‘Opposition hoten tawtawrawt ri ki dik lova hamtir che an tum laiin, ri nalh zaih mai, a ki dik tak maia i rawn ham ri ta tlat mai si kha chu a ropui lutuk a, ka’n chibai hmasa phawt mai teh ang che’ tiin ka chibai ta a ni.
Opposition hoten ralkhel dar indona tawtawrawt hamtira, tawtawrawt ri dik lo ri bengchheng tak, ri thum chher chhur mai leh ri teng chhiai chhuai, ngaihthlak hrehawm tak tur chu ngaihthlak an lo tum laiin, an beisei loh lutuk lam daih mai rimawi lutuk, indona tawtawrawt ri ni hauh lo, inremna leh lungrualna, hlimna tawtawrawt ri mawi tak mai chu Pu Sapa atang chuan a rawn ri chhuak ta tlat mai si a le. Mipui rilru hrisel pu mi, mi tam tak ten lawm avanga kut benga an lo nuih var var lai khan, tute emaw chu thinur tak leh lungngai takin an lo indawm kun tum bur mai lo ang maw, te ka lo ti deuh a ni.
Pu Sapa hian tute emaw angin ama hma chauh sial ve lovin, kan ram hma lam hun tur hi thui tak a ngaihtuah thiam pha a, amah avang leh a ka atanga thu chhuak avangin kan ram hma lam hun chhiat leh that theih dan turah hian mawh a phur a ni tih hi a hre chiang em em a ni. Chuvangin, mihring rilru pawnlawi tak leh rilru tereuhte chu pu ve lovin, inngaihtlawmna zahawm tak nen, kan ram tan liau liau a lo tlawm ngam ta hi a ropuiin fak leh chawimawi a phu em em a ni. Hei hi nakin thleng pawha mi thil chik miten an la sawi fo tur, kan ram political history pakhat a la ni ngei ang le. Pu Sapa nge nge.
Pu K. Sapdanga hi mi ril tak, rilru fim tak pu chunga politician dik tak niin a hriat a ni. Pu Sapa hian party chhung boruak tih daih nan vel mai mai a hetiang thu hi sawi niin a rinawm loh. He khawvel pumpuia Democracy inthlang rama political party zawng zawngte chakna leh mipui an hip theihna chu an hotu ber, top leader te huhang neih dan hi an ni zel tih hi a hre chiang hle niin a hriat a ni. ZPM pawh hi heti taka mipuiin an ngaihzawn rawn chhan lian ber zinga pakhat chu Pu Lalduhawma huhang vang hi a ni tih hi a hai lo niin a lang a ni. Chu leadership nei lian ber chu eng vangin nge party inrelbawlna hotu ber a nih loh bik tehlul ang le. Tunhmaa party dang ho pawhin an party President chu Chief Minister an nih kawptir zel tho a ni lawm ni? ZPM nih vanga nih kawp theih lohna chhan tur a awm miah lo. Party ve tho an ni a, party thatna tur leh party chakna tur chu an duh duh danin an tih ve a ngai tlat alawm. Pawn lam atang hian enge lo sawi ve tur kan neih? Hmana tha tur nia an hriat kha thil awm dan an thlirin tha lo an ti leh ta a ni mai. Chu thil chu ngun tak leh fim taka a ngaihtuah hnuah huai takin Pu Sapa hian a rawn sawi chhuak ta a nih hi. Pu Sapa nge nge.
A thuhrimah, kan ram tana thil thui tak, thil tak tak ngaihtuah pha ve mang si lova, mi party boruak vel ringawt mai lo buaipuite, eng dang mah ngaihtuah lova, mi party tihchhiat dan tur ringawt mai buaipui hi ram leh hnam hruai tum inti ve si hote tih dan tur chu emaw ni dawn le? Chutiang chu em ni politic an lo tih thin chu ni dawn le? Chu’ng hote chu em ni mi fing politicians an tih hote chu ni le?
ZPM lo pian hma khan kan ram leh hnam, kan sawrkar awm danah khan mi tam tak an mangang a, mahni theih dan danin ngaihtuahna an seng a, kan ram hma lam hun atan mahni thiam dan danin tan an la hlawm a nih kha. Mahni leh a huho te pawha Pathian hnena lo tawngtai ngat ngat thinte pawh an awm a nih kha. Khatih hun lai khan Pu Sapa leh mi dang engemaw zat, political party lama hming lang ngai lem lo, mi thiam leh mi ril, mi ngaihsanawm leh kan hnam tan mi pawimawh tak takte khan kan ram hmalam hun tur thlir khan vawi tam tak an lo inrawnkhawm tawh thin a nih kha. Chu’ng ho zinga mi pakhat chauh hming hi enge maw avanga han sawilan hram ka duh chu, Mizo zinga IPS tling hmasa Pu F. Lalremsiama hi a ni. Tichuan, a tawp tawpah chuan, Vanglaini chanchinbu hmun pui Durtlangah chuan tuna ZPM party hi a lo piang ta a nih hi. ZPM party lo pian chhan hi lalna leh thuneihna chan ve duh vang hrim hrim ni lo, intih ropui leh intih hausak duh ve vang ni lo, tute emaw anga mahni hmasial vang pawh ni lo, kan ram leh hnam mangang au thawm avang liau liauva lo piang a ni tih hi phat theih a ni lo.
Chuvangin, nakin hmalam hun tur chu kan sawi thei lo, mahse, tuna opposition ho tum dan leh duh dan ang hian Pu Sapa leh tu tute emaw hi chu tunhmaa tute emaw ang khan han tal hiar ve ta ngat se la chuan, ZPM party te hi han tlu chhe leh nghal ta mai se la chuan, kan ram hmalam hun tur chu a thim khawp ang le. Amaherawhchu, Pathianin Pu Sapa te rilru a rawn ti vara, ram leh hnam hmangaih vang liau liauin huaisen takin an lo tlawm ngam ta a nih hi. Pu Sapa nge nge.
A thuhrimah, ZPM party hi tuna an party hruaitute leh an worker tlem te te avanga sawrkarna leh rorelna chang an ni lo tih hi mipui leh anmahni ZPM party hruaitute ngei leh opposition ho pawh hian lo hre nawn leh ila. Tuna an party Hqtr. Office bearer zawng zawng pawh hi lo phirsi zo vek pawh ni se la, Setana avanga ZPM tlukchhiat phallotu mipui zingah hian anmahni thlak zo tur hi chu kan la tam ang tih hi kan vaiin i hre reng ang u. Tuna ZPM Chief Minister, Minister, MLA leh an party hruaitute hi Setana avang hian lo khawbaw zo vek pawh ni se, Pathianin kan ram tan ZPM hi ding zel tura a duh phawt chuan, tuna hming langsar ve lem lo tutute emaw hmangin Pathianin ZPM hi chu a tinung zel tho ang tih hi kei chuan ka ring tlat a ni. Amaherawhchu Pathian thu a ni e.
Chuvangin, tuna ZPM unit level atanga party hruaitu lian zawng zawngte leh sawrkara a thi beh zawng zawngte, MLA, Minister leh Chief Minister thleng hian rilru fim tak pu chunga awm chin tawk hriat a tul hle ang.
Chutiang bawkin opposition ho pawh hian ZPM tih chhiat dan tur ringawt zawnga bei bei lo hian, ZPM aia tha zawk kan ram tana tih dan turte hi lo ngaihtuah zawk ula. Chuti ni lova, engtin tin emaw ZPM chu lo ti chhe thei ta tehreng pawh chu ni ula, tuna in khawsak dan ang ringawt hi chuan mipui hian kan ring tak tak thei dawn che u emaw ni le? Tunhma leh tuna in khawsak dan ang ringawt hi chuan, nangni leh in tu leh fate khawsak ve thona he kan ram hi a va ngaihtuahawm dawn ve maw le.
Khawvel hnam tin zingah hian hruaitu chan chang tur bik deuh, huhang nei lian bik, mi chungchuang bik, mi hneh theih riauna nei bik hi an lo chawr chhuak thin. Mizo zingah pawh chutiang mi chu kan lo nei thin tawh. Mizoram political party hruaitute zingah pawh an lo awm tawh thin. Mahse, chu’ng mite hun chu a liam tawh. Tuna Pu Lalduhawma hun pawh hian liam hun a la nei ve ang. Pu Lalduhawma hnuah hian tunge lo lang dawn tih hi mipuite ngaihtuahna pakhat chu a ni. Chuvangin, opposition ho hian tuna ZPM hi lo tichhe thei ta pawh chu ni ula, nangni ni lo hi mi dang tute emaw chu kan ram mipui tan hian an rawn lang leh tho ang tih hi a rinawm a ni.
Thil pakhat-Vanglaini chanchinbu hmun pui Durtlang Gosen venga mi khi ropui ka ti hle mai a. India ram chanchinbu liante hmun pui leh khawvel hmun dang news hmun puite hi TV vel atang bak hi chuan ka la hmu ve lo naa, mahse, anni ho ai hian a nep bik dawn chuang em ni le, ka ti hial a ni. Pu Vana hian kimchang deuhin special report han nei se ka ti hle mai.
‘Ka’ tih hi hmang fo tawh lo se la, ‘Kan’ te hi han ti thei ta thin se la chuan a lo ngaithlatute beng a dam kim tlang zaih ni mai tur, te ka lo ti ve mai mai thin a ni.