Pu Zorama hnuaiah Zoramin
hma a sawn nasa – Lalruatkima
Chief minister Pu Zoramthanga hnuaiah Zoramin hma a sawn nasa hle niin MNF minister Lalruatkima chuan a sawi.
Dawrpui Vengthara MNF party inkhawm a hmanpuinaah Aizawl West II MLA ni bawk Lalruatkima chuan ZPM leh Congress chu MNF sawrkar thawh aiin an thawk tha thei chuang lo tih a chiang nia sawiin, “Congress chu kan hre tawh a, ZPM pawh kan hriat sa te kha an ni nual hlawm. Tuna an MLA leh AMC councillor-te pawh en ila, MNF nen an danglamna tehchiam a awm lo. Pu Zoramthanga hnuaiah hian Zoramin hma a sawn nasa em em a, chu chu kan hmu mek a, kan hmu zel dawn bawk a ni,” a ti.
Hrileng, lirnghing, vawk pul hri, ramri buai leh chhan hrang hrang vanga Zoramin hun harsa tak a tawh laiin, Pathian hruaina bakah Pu Zoramthanga ruahman thiamnate, NGO leh kohhran thawhhona avangin kan paltlang thei a. Chhuanchham awm loin vawiin kan thleng thei, tia sawiin lawmawm a tih thu a sawi. Tunah hri a ziaawm chho a, hmasawnna nasa lehzual he ram tan hian a thleng ngei dawn, tiin a sawi bawk.
MNF chu Mizo nationalism kengtu, kan hnam, kan ram leh kan sakhua a him zelna tura thawktu a tih Lalruatkima hian a sawi a. “A chhe thei ang bera thudik ziktluak lo leh dawt hmangtein beih kan tawk thin. Sawiselna leh deuna karah pawh kan Pathian chu kan vuan tlat a, chhe lailet dera puhna karah pawh Pathianin min hruai zel a ni,” a ti.
Pu Zorama hnuaiah Zoramin hma a sawn nasa – Lalruatkima
