Puantah in sakna tur tumsak
National Handloom Development Programme (NHDP) hnuaia Small Cluster Development Programme (SCDP) kaltlanga Lunglei district Mualthuam ‘N’ leh Kanghmun ‘S’ khuaa puantah in (individual workshed) sakna tur dawngtute hnenah Inrinni khan sem a ni.
Lunglei North bialtu MLA, Lunglei High Powered Committee vice chairman V Malsawmtluanga chuan hmanpuiin, sawrkar laipui atanga khua leh tuite hamthatna tur ruahmanna hrang hrang kalpui thinah a dawngtuten an hman dik tawk loh avangin dawn leh turah harsatna tawk an awm thin tih a sawi a. NHDP SCDP hnuaia puantah in sakna dawngtute chu rintlak leh belhchian tlaka an sum hmuh hmang ngei turin a chah. Kanghmun South leh Mualthuam ‘N’ khua chu puan tah (handloom) kaltlanga khaw dangte tana entawn tlak, model khua ni ngei turin a chah bawk.
Hmanpuitu dang, Commerce & Industries director Maria CT Zuali chuan Mizo zingah puantah chu hmeichhe tih tura dahna rilru a awm tih sawiin, chakna leh theihna ngah zawk Mizo mipaten handloom luhchilh tak tak se a duh tih a sawi.
NHDP hnuaia Small Cluster Development Programme kaltlanga puan tah in sakna sem hi Mualthuam ‘N’ atangin mi 173 leh Kanghmun South atangin mi 121-in an dawng a. Puan tah in sakna tur hian Rs. 120000 theuh pek an ni.
Puantah in sakna tur tumsak
