Mizoram state rorelna sang ber Mizoram Legislative Assembly hnuaia Assembly Committee zinga upa ber, sawrkar/mipui sum hman dan a dik leh dik loh endiktu Public Accounts Committee chuan nimin khan press mite hmachhawnin hma an lak dan an puangzar a. Hetianga Assembly Committee member-ten press mite hmachhawna an hmalak dan puanzarna ang hi thil thleng zen zen lo a ni a, Assembly Committee peng hrang hrang dangte pawh hian an hnathawh dan hi press mite kaltlangin puangzar thin se, langtlang taka hnathawhna hian hmasawnna tha zawk a hring chhuak ngeiin a rinawm.
Assembly Session neih chhunga PAC-in emaw, Assembly Committee dangte pawhin, Report an thehluh hi han en ila, hna chu an thawk nasa hle tih a hriat a. Sawrkar department hrang hrang hnuaia hmasawnna hnathawhnaa sum hman dan dik lo, Comptroller & Audit General of India-in Report a thehluh bawhzuiin hma lak a ni thin.
Entirna pakhat han tarlang ila: Sawrkar kaltaa Assembly Session hnuhnung bera PAC (2021-2023) Report (11th)-ah khan Agriculture department hnuaia sum hman dan dik lo chungchang PAC-in a chhuina tarlan a ni a. (Ref: Para 2.3.8.4 on the Report of CAG for the year 2015-16). Recomendation-ah chuan, PAC Report 9-na dungzuiin) sum chingpen cheng vaibelchhe 1.65 hmuh let lehna turin department-in chak takin hma a la tur a ni, tia dah a ni a. A hnuah ‘Action taken by the government’ tih a lo lang leh a. Chutah chuan Japan rama zirlai 15 (Learn & Earn) tirhna tura sum cheng vaibelchhe 1.65 hman a nih dan chhuina tarlan a ni a. Recommendation-ah chuan, department hian tun hnuah chuan ‘incorrect information’ PAC hnena thehlut lo turin fimkhur tawh rawh se, tia tarlan a ni a. ‘Action taken report’-ah chuan, ‘department-in incorrect information a pe hi a lungawithlak lohin a pawi (deeply regretted) hle a, tun hnuah chuan PAC-ah ‘correct information’ chauh an pe tawh tur a ni, tih a ni a.
A tlangpuiin ‘recommendation’ leh ‘action taken’ hi a tluangtlam deuh lo maw a tih theih awm e. Hei vang hi em ni ang, ‘Executive lamin palzam chang a nei ta deuh em’ tih ngaihdan a awm chhan hi ni zawk ang tih a ngaihtuah theih rum rum a ni. Dik lo taka thiltih a awm tih finfiah thlap tawh pawh, a hremna dan leklam aiin ‘deeply regretted’ tihah hian thuneitute pawh hian an duhtawk ve mai zel bawk a ni lo maw, a tih theih awm e.
PAC hian chak tak leh huaisen taka hma an lak theih phawt chuan dik lo tam tak hi an siam tha thei ngei ang.