PUC-ah free medical clinic
Pachhunga University College (PUC)-a zirlai hlui pawl pakhat – Lenrualhlui, Regional Institute of Paramedicals and Nursing Sciences (RIPANS) leh he college Health Care Committee chuan Nilaini khan PUC campus-ah free medical clinic an buatsaih.
RIPANS-a thawkte leh Lenrualhlui member, medical lama thawkten zirlai, he college-a thawk leh pension tawhte hriselna dinhmun an ensak a. PUC Health Care Commitee secretary Dr Esther Laltlankimi chuan, darkar thum chhungin mi 400 vel en hman tih a sawi a. Test ngai, hmun leh hmuna tih mai theih ang chu an ti nghal vek bawk tih a sawi.
PUC principal Prof H Lalthanzara chuan zirlaite hriselna an ngaipawimawhin taksa hriselna bakah rilru hrisel an neih theihnan clinical psychologist-te ruaiin a mamawh tan counselling a thlawna dawn theihin a chhawp tih a sawi a. Zirlaiin an mamawh thuta hman theih turin academic department tinah firstaid kit an dah tih a sawi bawk.
RIPANS principal Prof Lalfamkimi chuan free medical clinic hi mipui tana rawngbawlna (community outreach) peng pakhat atan an kalpui tih a sawi a. India ram state hrang hrang atangin zirlai an kalkhawm a, Jammu & Kashmir atang pawhin zirlai engemawzat an awm tih sawiin, an hnena zirchhuakte hi India ram chauh ni lo, khawvel ram hrang hrangah hna thawkin an awm tih a sawi a ni.
PUC-ah free medical clinic
