Puducherry-a hmeichhe legislator awm chhun S Chandira Priyanga chu AINRC-BJP sorkar minister a nihna atangin ‘caste-based discrimination’ a awm tiin a bang.
A ban chhan sawifiahin kum 34-a upa chuan ‘mipa te thunun’ politics khawvelah hmeichhiate tan hmun a awm ve lo tiin a sawi.
“Hmeichhiate chu hmeichhia anga en an ni a. Lehkhathiam i ni thei a, chhungkaw awm thei atanga chhuak pawh i ni mai thei a, mahse mipate thunun politics khawvel-ah hian chutianga en i ni dawn lova tihchhiat che tum a ni zawk ang. Theihna nei thain i hna thawk tha mah la, zah i hlawh chuang lovang,” tiin Priyang chuan a sawi bawk.
Kum 2021 khan Neduncadu MLA hi kum 40 hnua union territory a hmeichhe minister ni thei leh hmasa ber a ni a. Priyanga hnenah hian N Ranagsamy kaihhruai coalition sorkar chuan Transport portfolio an pe a ni.
Priyanga chuan Dalit hmeichhia a nihna chu a chhuan em em reng thu sawiin amah tihchhiat nana hman a nih a beisei ngai loh thu a sawi bawk a. “Ka ban hnu hian ka zalen zawkin ka hria a, keimaha rinna nghattute tan tha zawkin ka thawk thei dawnin ka hria,” tiin a sawi bawk a.
“Mipa nge i nih hmeichhia tih te, khawi atanga lokal nge i nih tihte hi a pawimawh tur a ni lo. A pawimawh ber chu i hna i thawk tha thei em tih leh mipuite tan i thawk em tih zawk a ni a, chutak chu kalpui hleih theih lohin a awm a. Mipate khawvela diriam reng hi ka tuar thei tawh lo a ni,” tiin a sawi bawk.
A banna thehluhah Priyanga chuan Chief Minisetr N Rangasamy chu Dalit, Vanniyar emaw marginalised community ami kher chu amah thlak tura ruat turin a ngen bawk.
A lar leh an duh em avanga Assembly a lut thei a nih thu sawiin mahse ‘inphatsanna politics leh sum atchilhna hi ka bei thei lo’ tiin a sawi bawk.
“Nasa taka beih chhunzawm rengin ka awm a, phatsanna leh money power hi ka tuar zo tawh lo,” tiin a sawi bawk.
Puducherry hmeichhia minister bang
