Punjab-ah ruihhlo do beihpui thlak

Punjab-ah ruihhlo do beihpui thlak
Punjab Police chuan state pumah ruihhlo lakah beihpui thlakin Inrinni khan hmun 750 chuang an dap.
Beihpui thlaknaah hian police 12,000 vel thawk chhuakin ruihhlo do beihpui an thlak mek kal zela an tih a ni.
Punjab Chief Minister Bhagwant Mann chuan Zirtawpni khan an state chu thla thum chhungin ruihhlo awm lohna a nih tur thu a puang a. State sorkarin ruihhlo avanga buaina an tawh mek bei let tur hian a zuarte laka an chet bakah an thil neihte pawh an tihchhiatsak.
Cabinet Minister Aman Arora chuan Inrinni khan political party-te chu sorkar hmalakna politic khelh nana hmang lova ruihhlo dona thlawp turin a sawm.
Vantlang leh sakhaw pawl bakah tlawmngai pawlte pawh sorkar thawhpuia Punjab chu ruihhlo awm lohna state-a siam turin a sawm bawk.
Police hian state puma ruihhlo tamna hmunah cordon & search operation (CASO) an ti a. Heng hmunte hi ruihhlo hralhna hmun niin a tawlhtu mi 290 manin FIR 232 an ziak lut.
Director General of Police (DGP) Gaurav Yadav chuan darkar li chhung beihpui an thlakah hian heroin kg 8.14, opium kg 1.21, ganja kg 3.5, poppy husk kg 19, chara gram 700, damdawi mum 16,238 leh pawisa Rs nuai 8.02 an man tih a sawi.
Police chuan ruihhlo tamna hmun 369 kharin hmun 798 an dap tih an sawi.
DGP hian an state-ah ruihhlo a bo hma chuan kawng hrang hrangin police-in beihpui an thlak chhunzawm zel tur thu a sawi bawk.
Cabinet Sub-committee on the Drug Menace chairman, finance minister ni bawk, Harpal Singh Cheema chuan Inrinnia an thutkhawm hma lawkin, “Aam Aadmi Party chuan lian takin ruihhlo kpna a kalpui a. Chief Minister Bhagwant Mann-a’n inkaihhruaina khauh tak a tichhuak bawk a. Punjab-a ruihhlo thehdarhtu chu na taka hrem zel a ni ang,” a ti.
Cabinet sub-committee member-te hian police hmalakna hi an enpui zel dawn a. Cheema hian Pathankot, Gurdaspur, Nawanshahr, Hoshiarpur, Rupnagar leh Tarn Taran district-a hmalakna tlawhin member dangte pawhin district hrang hrang an tlawh tur an ruahman vek.
Cheema hian ruihhlo ngawl vei kawl chhungkuate pawh an drug de-addiction enkawlna hmuna dah phal turin a ngen.
State sorkar hian Finance Minister Cheema kaihhruai turin police leh health department ten ruihhlo laka beihpui an thlak dan tur leh kalpui dan enpuitu tur committee hi a din a ni.