Aam Aadmi Party (AAP) hruaitu, Delhi water minister hlui, Satyendar Jain-a chuan Delhi Jal Board-a ei rukna kaihhnawiha an man chhan chu Punjab assembly inthlan lo awm tur vang zawk a nih thu a sawi.
Kum 2022-a sup chhehrelh thubuaia mana thla 18 lung in lo tang tawh, Jain-a hi Anti-Corruption Branch (ACB)-in Thawhlehni khan Delhi Jal Board-a tender chhuah leh chhan dan dik tawk lo chhuinaah an man a. Rouse Avenue Court, Delhi-ah hruai niin thuthar lakhawmtute hnenah, “Punjab inthlan tur vang zawk a ni,” a ti.
Jain-a leh ex-Delhi Jal Board CEO hlui, Udit Prakash Rai-a leh mi dang palite hi Nilaini khan court-ah hruai an ni.
Jain-a dan hre mi, Advocate N Hariharan-a chuan ‘dan kalha man’ niin a sawi a. “ACB-in an mi puh hi an man chhan an hrilh lo va. Enforcement Department (ED) chuan tisual ngeiin an sawi a, an man lo va. ACB erawh chuan thu zawh tura kovin an man a ni,” a ti.
Jain-a leh mi dangte hi Delhi-a Sewage Treatment Plant (STP) tihchangtlunna tur kaihhnawiha man an ni a. “An man chhan hi a dik lo vek a, Jain-a hian thamna a la tih finfiahna a awm lo,” a ti.
ACB chuan Directorate of Vigilance-in complaint an siamah Delhi Jal Board-in STP tihchangtlunna tur hna thawhna kalpui danah dik lo lian tak tak a awm a, tender chhuah leh thlan danah pawh a awm niin an sawi tih an tar lang.
An chhuinaah tender kalpui danah tihbik leh duhsak bik technology provider pakhat, Euroteck Environment Pvt Ltd-in an chhana an hmuh ngei theih nan thil kalpui niin an sawi.
“Chhuinaah hian CEO thin, Udit Prakash Rai-a hian M/s AN Enterprises atangin amah leh a chhungte bank account-ah a dawng a, khawihsawn theih loh thil a lei,” tiin ACB chuan an sawi.
Jain-a leh Rai-a bakah hian contractual consultant Ankit Srivastava, M/s AN Enterprises neitu Nagendra Yadav, M/2 Euroteck Environment Pvt Ltd neitu Raja Kumar Kurra leh M/s Srijanhar neitu Pankaj Verma te pawh man an ni.
Punjab inthlan tur vang maiin min man – AAP hruaitu Jain
