‘Pushpa 2’-in Hindi box office record siam
Allu Arjun leh Rashmika Mandanna te channa South Indian film ‘Pushpa 2: The Rule’ chuan Indian cinema hall lamah ro a la rel chhunzawm zel a, he film hi Telegu, Malayalam leh Hindi version te siam niin, a Hindi version hian ‘Stree 2’ record khumin, Hindi film tlangzarh tawh zinga cinema hall ticket hralhna atanga cheng vaibelchhe 600 la lut thei hmasa ber a ni.
He record hi Shah Rukh Khan channa ‘Pathaan’ khan siamin, cheng vaibelchhe 524 a la lut thei a, he record hi a ding rei hman vak lo, SRK channa dang ‘Jawan’-in vaibelchhe 582.31 la lut theiin a rawn khum leh thuai a, chu record chu kuminah Rajkummar Rao film siam, Shraddha Kapoor channa ‘Stree 2’-in vaibelchhe 597.99 la lut thei a rawn khum leh ta a ni.
Tunah Sukumar film direct ‘Pushpa 2: The Rule’ hian cinema hall -a an chhuah tan atanga ni 14 chhungin a Hindi version-in cheng vaibelchhe 607.35 la lut theiin a rawn khum ve leh ta a, Hindi film zinga cinema hall ticket hralhna atanga cheng vaibelchhe 600 la lut thei hmasa ber a ni ta bawk.
Pushpa 2: The Rule hian a version hrang hrang hmangin an tlangzarh atanga kar khat chhungin cheng vaibelchhe 725 a la lut nghal thei a, ni ruk dang chhungin vaibelchhe 257 belh lehin, kar hnih chhungin cheng vaibelchhe 973.1 a la lut tling tawh a, cheng vaibelchhe 30 a lak luh belh leh thei a nih chuan Hindi film chauh ni lo, Indian film zinga sum la lut tam ber record a siam thei tawh dawn a, tunah hian he record siamtu hi Prabhas channa ‘Baahubali 2 – The Conclusion’ kha niin, he film hian cheng vaibelchhe 1030 a la lut thei a ni.
‘Pushpa 2’-in Hindi box office record siam
