Putin-a leh North Korean foreign minister inkawm

Putin-a leh North Korean foreign minister inkawm
Russian President Vladimir Putin-a chuan North Korean Foreign Minister Choe Son Hui-i a hmu a, Ukraine indona a chhuah hnuah ram pahnihte hi an inkawmngeih thar zual zel.
Russian sorkar news agency-in video a tihchhuahah Putin-a hian Choe-i hi Thawhtanni khan Kremlin-ah a lo dawngsawng a. An inkawmnaah hian Russian palai hotu, Sergey Lavrov-a pawh a tel tih a lang.
Russia-a Sputnik news agency chuan Putin-a hian an ram hnih ‘inkungkaihna leh an inkawmngeihna chu ruahman angin a kal’ tih a sawi a, North Korean hruaitu, Kim Jong Un-a chungah pawh a lawm hle tih a sawi niin an tar lang a. Choe-i pawhin Kim-a’n ‘chibai tha bik’ a hlan thu a hrilh ve bawk.
Khawthlang ramten an hrek ve ve, Russia leh North Korea hian tun hnaiah an inzawmna an tinghet nasa a, kum 2024 khan ram venhimnaa thawh dunna ziakin an ram chu miin an nek chuan sipai thila inpuih tawnna tur a tel.
Hemi hnuah hian Russia-in Ukraine a rûn mekah North Korea hian sipai 10,000 vel a thawn a, 600 vel thi an awm tawh niin Seoul leh Kyiv chuan a sawi.
Pyongyang-in sipai an thawn tih hi April khan a vawi khat nan sawi chhuakin Russia chu Ukrainian beih letna avanga hmun pawimawh tak, Kursk region an lak letnaah an pui niin an sawi.
A hnu ni eng emaw zatah Kim-a hian Pyongyang-ah indonaa thi North Korean sipaite hriat rengna puala din museum a hawng a. Indonaa sipai an tirh chu Russia nena ‘sipaia an inpumkhatnaa bung thar’ a nih thu leh ‘hneh theih loh tangrual’ an nih thu a sawi.
Putin-a’n hmaichhana Kim-a a hmuh hnuhnung ber chu Beijing-a September 3-a an inhmuh kha niin Chinese President Xi Jinping-a’n sipai kalrem lâm a thlenah an inkawm zui a. Putin-a hian Ukraine indonaa ‘huaisen leh pasaltha taka’ an beih avangin North Korean sipaite a fak nghe nghe.
Russia-North Korea inkawmngeih thar hi US chuan a ngaimawh hle a, van thengreng leh thlalema hmalakna telin, Russia hian thiamthilah North Korea a pui tih finfiahna chiang tak a awm niin an sawi a. September thlaa Putin-a leh Kim-a an inbiak hnuah khan US President Donald Trump-a chuan US an phiar niin a sawi a, Kremlin chuan a pha thung.