Russian nationalist leh ex-rebel commander Igor Girkin, Ukraine khawchhak lama pro-Moscow militant te kaihruaitu ber ni thin chu Kremlin a sawisel chamchi avangin kum li lung in tang tura tih a ni.
Girkin hian hming lem “Strelkov” nei bawkin kum 2014 a Ukraine’s Donbas region a Kremlin thlawp seperatist leh Kyiv armed forces te intihbuainaa a meizanghlaptu ber a ni a.
Moscow City Court chuan kum 53-a upa chu ‘exremist activities kalpui tura mipui a sawm’ avanga thiam loh chantir a nih thu sawiin general regime colony-ah dah a ni ang, a ti a.
“Fatherland tan ka thawk asin” tiin Girkin chuan amah hremna tihchhuah a nih hnuah a auzui a ni.
Nikum khan Russia military lehader leh President Valdimir Putin te chu Ukraine lakah chetla nasa tawk lo tia mipui nawlpui hriata a beih avangin man a lo ni tawh bawk.
Girkin chuan Putin chu ‘old idiot’ tia sawiin ‘Dawihzep mi satliahin thuneihna a chan chhung chuan kan ram hian kum ruk pawh a daih tawh lovang’ tiin social media-ah te a post a ni.
Putin a sawiselna na tak te chu ni tinin a social media channel siamah a post thin a, thuneitute chuan thla eng emawti chhung chu an enliam mai mai a, chutih laiin Kremlin liberal opponent te zawk chu Russia-in Ukraine war a kalpui dana an sawiselna na lo zawk takah pawh hrem an ni zawk.
Nikum June thlaa Wagner commander Yevgeny Prigozhin leh a sipai za tel tena Russia military leadership laka helna hun rei lo te an kalpui atang khan Moscow boruak a inthlak danglam dawrh tih a ni a.
Moscow chuan nationalist critic Girkin chu a man zui nghal a ni. Lung ina khung a nih lai pawhin March thlaa president thlanna neih turah Putin a khin tur thu a sawi bawk a.
Russian media tena Lung in a tan laia an kawmnaah pawh an ram chuan ngelnghehlohna nasa tak tawk mekin chhiat buaina a tawk thei tiin a sawi bawk. Russia-in kum 2014-a Ukraine sipai chakna hmanga a hnaih atang khan hmel langsar ber pahat chu Girkin a ni. Khami kum khan Moscow chuan Crimean peninsula lain a awpzui a ni.
FSB officer hlui Girkin chuan Donbas-ah silai keng pawl dinin chu chu Moscow-in a thlawp a, Sloviansk khua pawh lain rawng takin rorelna a lekkawh an ti bawk.
Girkin hi July 2014 a Malaysian Airlines plane MH17 eastern Ukraine a kapthlatu inhnamhnawih mi pathum zinga tel niin Netherlands court chuan dam chhung lung in tang tura hremna a lo tihchhuah tawh a ni bawk.
Kha thlawhna tlaah khan mi 298 in nunna chanin Kremlin erawh chuan a inhnamhnawih lo a ti tlat a, Girkin pawh Netherlands-in a ngen chungin a pe duh thak lo bawk.
“Khawthlang ramah terrorist anga ngaih ka ni tawh a, ka ramah ngei pawh extremist-a ngaih ka ni ta,” tiin man a nih hnuah a sawi.
MH17 kahthlak a nih hnu lawk khan eastern Ukraine chhuahsanin ultra-nationalist blogger leh hardliner backer turu tak a ni zui a. Hardline ‘Novorossiya’ ideology a Russia chu Ukraine ram zau tak chu a awp tur a ni tih pawmtu a ni.
February 24, 2022-a Russia-in Ukraine-a sipai a tirhluh tirh khan Girkin chuan awmze nei takin Ukraine ram pum chu a tahtawlin lak vek tur tiin a sawi nghe nghe.
Putin sawiseltu Girkin lung inah khung
