PwD tan inthlana tih tur rel

State Steering Committee for Accessible Election (SSCAE) chu an chairman, state chief electoral officer Madhup Vyas hoin Thawhtanni khan an thukhawm.
Mitin ban phak leh kalpawh theih inthlan nei tura district hrang hranga thahnemngai taka hma lak a ni chu lawmawm a tih thu SSCAE chairman hian a sawi a. Polling station tina vohbik (persons with disability) voter awmte chhinchhiah leh a tul anga ngaihven zel a, harsatna an tawh loh nana hma lak leh anmahni buaipui kawnga tul inzirtirna buatsaih chu ngaihpawimawh tur a ni tih a sawi.
Social Welfare, Tribal Affairs, Women & Child Development director Dr Lalhriatzuali Ralte chuan kumin September 27 atanga October 13 chhunga PwD-te pualin Assessment & Certification Camp buatsaih a ni tih a sawi a. District 11-a khaw 26-ah neih a ni a, he camp kaltlang hian electoral roll-a chuang PwD 2031, assessed PwD 1129, assessed PwD Medical Board pawmpui ngai 564, camp atanga voter certified 688 leh kum 18 chunglam UDID hnuai ami 3947 an tel a ni.
SSCAE hmalaknaa inthlan hlawhtling siam kawnga PwD voter-te tana ruahmanna fel tak siam a nih theih nan district election officer-te hmalakna in checklist bawhzui dan tur sawiho a ni a. PwD Assessment Camp-a tel an tam zawk theih nana hma lak tulte ngaihtuah niin, District Steering Committee on Accessible Election (DSCAE) thukhawm tum hnih tal neih a tul tih sawi a ni. PwD-te tana in lama vote thlak theih dan tur, an puala Special Awareness Campaign buatsaih chungchang, polling personnel-te training huna sign language telh bakah PwD voters record kimchang siam dan turte an rel bawk.