Asian Cup khelh mekah inelna thlengtu Qatar chu group stages ah an chak vek a, champion nawn leh turin rin an kai leh zual. Qatar hian thawh\an zana an khingpui China chu si khat faiin an hneh. Qatar an chak vek lai hian an khelh tawh chinah India an la tlawm vekthung a. India hian zanin hian fiahna hnuhnung an hmachhawn ang.
Inelna thlengtu Qatar hian Khalifa International Stadium-ah Asian khawmuala ram ropui ber China an mikhual a, inkhel thunun tak chungin goal an thun thei lawk bik lo. Hun rei tak chhung goal lut a awm theih loh hnuin minute 66-naah Hassan Al-Haydos chuan he inkhela goal awmchhun hi a thun. Al-Haydos goal hmangin Qatar hian hnehna an chang a, Group A-ah fal taka hmahruai chungin last 16 an inhlangkai.
Group A-ah hian inelna thlengtu Qatar hian point 9 an hmu a, pahnihna Tajikistan in point li chiah an hmu. Tajikistan hian thawh\an zana an khingpui Lebanon chu si an phurh hmasak zet hnuin an hneh let a, last 16 an inhlangkai.
Asian Cup khelh mekah India an che\ha lo hle a, an khelh hmasa pahnihah an tlawm zawn a, tla thei dinhmunah an ding mek. India hi Group B-ah Australia, Uzbekistan leh Syria te nen an awm tlang a, table mawngphah an ni mek. India hian vawiin tlai dar 5:00 hian Syria an hmachhawn dawn a, an chung chiaha awm Syria an hneh nawlh a nih chuan last 16 luh theihna beiseina tlem an la nei zui thei dawn. Group B a\ang hian Australia leh Uzbekistan an tlang chiang tawh a. Syria hian India an hneh a nih chuan last 16 lut ngei tura ngaih zui an ni ang.
Inelna kal mekah Group C a\angin Iran an tlang chiang tawh a, UAE chu tlang ngei tura ngaih an ni bawk. Group D a\angin Iraq an tlang chiang tawh a, Japan dinhmun a la chiang lo. Group E chu group ngaihnawm ber a ni mek a, Jordan, South Korea leh Bahrain ten group champion an la inchuh hlawm a, an pathum hian last 16 lut thei dinhmunah an ding. Group F a\angin Saudi Arabia an tlang chiang tawh a, Thailand dinhmun a \ha viau bawk.
Qatar an chak fai vek
