Scuderia AlphaTauri driver Daniel Ricciardo chu 2023 Dutch Grand Prix practice laia a hliam avangin a la bawksawp a, Zandovoort tlankawngah pawh khan inlan thei loin a aiah Liam Lawson chuan intlansiak a hmachhawn a; tun Pathianni Qatar Grand Prix atan pawh Australian hi a la inpeihchhuah hman loh avangin Lawson bawkin Alpha Tauri car a khalhchhuak leh dawn.
AlphaTauri team thupuangtu chuan Dutch Grand Prix practice laia a kut veilam ruh titliak Ricciardo chu US leilunga an tlan hunah a inpeihchhuah hman tawh a beisei thu sawi chungin tun din-hmunah Alpha Tauri chuan ngai awh leh turin an driver chu hun la pek rih an duh tih a sawi a, risk lak tha an tih loh thu a tarlang tel.
Kum 34 mi ni ve tawh Ri-cciardo hian intlansiak hnuhnung-ber Japan-a an tlan hnu khan ngai awh chho leh tura a beihna kawngah hun engngemawchen chu Red Bull simulator-ah hun a hmang a, Qatar lamah pawh tlankawngah a hmel hmuh tur a la awm dawn lo.
Season liamta tawpa McLaren-in an hnawl hnu khan Australian driver hian kumin July thla Hungarian Grand Prix-ah F1 intlansiak a hmachhawn leh tan chiah a; Zandovoort tlankawnga a inhliam hma pawh khan a team vawn mek tan intlansiak vawihnih chiah hmachhawn mah se Alpha Tauri lamin kum 2024 atana an race driver tur a nih thu an nemnghet tawh a ni.
Qatar hi ‘sprint’ tlan tur zinga tel a nih avangin nimin, Zirtawpni khan darkar khat chiah practice-na hun hawn niin, chawhnu lamah qualifying an tlan tan a, vawiin pawh hian qualifying session an chhunzawm leh zuai ang a, short sprint race-in a zui dawn a ni.
Naktuka Qatar Grand Prix an tlan tur hi Alpha Tauri tana Lawson-a’n race a hmachhawn tumngana tur niin, Singapore-ah khan pakuanaah thlengin point hnih a lo thawkchhuak ve tawh.
Qatar GP-ah Lawson kan hmu leh dawn
