Rajasthan a lirthei chetsualnaah mi 12 in nunna chan

Rajasthan a lirthei chetsualnaah mi 12 in nunna chan
Rajasthan-a Dholpur district-ah bus leh auto-rickshaw insu in, mi 12 in nunna an chan tih nimin khan police te chuan an sawi. An sawi danin he thil thlen hun hi inrinni zan kha niin, nunna chan zingah hian naupang pawh an tel thu an sawi.
Shiv Lahari Meena, Bari Kotwali Police Station chuan media-te a kawmnaah, ‘Inrinni zan dar 11 vel khan sleeper bus chu Dhaulpur atangin Jaipur panin a kal a, Sunipur bulah hian chetsualna hi thlengin, auto-rickshaw nen insuin mi 12-in nunna an chan tawh a ni,’ a ti a, ‘nunna chan zingah hian hmeichhe puitling pathum, auto-rickshaw driver leh naupang engemaw zat an tel,’ a ti.
Rajasthan Chief Minister Bhajan Lal Sharma chuan chetsualna thleng chu pawi a tih thu sawiin, hliam tuarte pawh enkawlna tha ber pe vek turin damdawiin thuneitute a hriattir nghal bawk.
Sharma chuan, ‘Dholpur kawngpuia chetsualna rapthlak tak thlenga nunna chan chanchin hriat hi a lungchhiatthlak hle. District administration official-te hnenah hliam tuarte chu damdawi in lamah enkawlna tha tak pe turin hriattir an ni. Boralte thlarau leh an chhungte tan ka tawngtai bawk e,’ a ti.
Rajasthan CM hlui leh Congress hruaitu Ashok Gehlot pawhin pawi a tih thu sawiin, ‘Dholpur chetsualnaa mi 12 in nunna an chan hi a lungchhiatthlak tak zet a, hliam tuarte tan leh nunna chan chhungte zawng zawng tan ka tawngtai a ni,” tiin a sawi bawk.