Commerce, Industries, Geology & Mining department buatsaihin Ningani khan ralthuam siam chhuaha India ram intodelh thei tura state tin hmachhawp zirhona – ‘Atmanirbharata in Defence Manufacturing – Promoting States Ecosystem’ neih a ni.
Commerce & Industries additional director Lalhmunsiama chuan, Mizoramah a vawikhatna atan hetiang zirhona buatsaih theih a ni chu lawmawm a tih thu a sawi a. Mizoram chu state dang nena khaikhin chuan ralthuam siam chhuah mang a la awm loa, tlem tal pawh a thawh theih chuan India ramin mahni intodelh a tum kawngah a hlawhtlin pui ngei a ring tih a sawi. August thlaa national level summit neih tur inbuatsaihna atan tunah hian lo zirho a ni tih sawi a ni
Ministry of Defence Department of Defence Production joint director Ajit Dubey chuan telpuiin, hmarchhak state leh ramri hrula awm state tan he zirhona pawimawh dan leh hmabak a sawi a. Department of Defence Production hmalakna a sawifiah bawk.
Commerce & Industries deputy director Ronald Lalchhuanawma chuan, BHAVYA Scheme a sawifiah a, Bharat Audyogik Vikas Yojna Scheme tum ber chu, industry park 100 siam a ni a, industry din dawna harsatna awm thin – ram lei, eng awm tha lo leh thil tih man sang ti ziaawm tur atana duan a ni tih a sawi.
Zirhonaah hian NIt Mizoram, MZU, Ex-servicemen, industry pawl, LESDE, MIStIC leh MSME lam hotute an tel.
Ralthuam siam lama Mizoram in tha a thawh theih dan zirho
