National Investigation Agency (NIA) chuan tunhnai khan Mizoram mi pakhat chu ralthuam tawlhruk chungchangah an man.
NIA thuchhuah danin, Mamit lam mi Lalngaihawma hi India hmarchhak bial mai ni lo, ramdang nena inrina velah pawh ralthuam tawlhruknaa inhnamhnawihah an puh a. Hemi chungchangah hian nikum December 26 khan Indian Penal Code, Unlawful Activities (Prevention) Act, Explosive Substances Act leh Arms Act tlawhchhanin thubuai an lo ziaklut tawh tih an sawi.
Mizoram Police hotuten zawhna an chhan danin, Lalngaihawma hi Mizoram Police intelligence-a thawk a ni a, phone hmanga mi nena an inbiakna lo ngaihthlak sak a nih hnu ah February 1 zan khan man a ni a, a kut atangin ralthuam man an nei lo. Amah hi intelligence lama thawk a nih avangin hel pawl mi thenkhat nen an inbe ngeia an rin thu an sawi a, ralthuam tawlhruk lama a inhnamhnawih erawh an ring lo tih an sawi a ni
Police hotute chuan Mizoram mi thenkhat chu Manipur-a Zofate tana ralthuam khawnsakah NIA hian an ringhlel a, Mizoram sawrkar phalna pawh la lem loin an duh ang angin an rawn chhui mai nia an hriat thu an sawi a ni.
Ralthuam tawlhrua NIA rinhlelh Mizo pa man
