President Donald Trump-a chuan US-in ralthuam a tlachham nia sawi awm chu a pha a, social media-ah a sorkar chuan thu pawimawh tiputtu chu ‘rei tak lung in tang turin’ an hrem dawn tih a sawi bawk.
“US hian ralthuam chi hrang hrang a nei tam tawk,” tiin Trump-a hian Ningani tuk (India-a tlai lam) khan a tar lang a. “Tam tak siam niin US-in a mamawh angin thawn zel a ni,” a ti bawk.
Trump-a leh Pentagon chuan tun hnai khan Iran laka indo thla ruk an kalpui tawhah an sipaite ralthuam chungchangah zawhna an tawng thar.
US leh Iran hi chawlh nei zauh zauh mah se an inkap tawn reng a, an tawp dawn em tih engmah chiang a la awm thei lo.
Sorkar chuan Operation Epic Fury an kalpui leh an inkah tawnnaah ralthuam siam harsa tak tak hmang mah se missile an la ngah tawk tih American-te an hriattir.
CBS News chuan US hian indonaah hian hmun hrang hranga hmun hlaa mi kap fuh chat thei missile a chhek sate a hmang ral tan tawh niin chi hnih atanga an thu dawn a tar lang.
Hetih lai hian Washington Post pawhin Nilaini tlai khan Trump-a hian Defence Secretary Pete Hegseth-a chu ralthuam indaih loh awm thei chungchang a sawipui niin thu a dawn a tar lang bawk.
“Hetiang thu ‘tiputtute’ hi pelh thluk an ni dawn,” tiin Trump-a hian Truth Social-ah a tar lang a. “Rei tak lung in tan an hmabak!” a ti bawk.
Washington Post-in an tar lan chu a hnuah chhang zuiin, “Thu dik lo an ‘chhuah’ hi ram phatsanna a ni!” a ti a. “Pete Hegseth-a’n hna a thawh dan hian min tihlim em em a ni,” a ti bawk.
US-in missile a neih zat hi chiang taka hriat theih a ni lo va. Hegseth-a secretary a nih atang khan Pentagon atanga chanchinbu miten an hriat tur tihchhuah tur chinah khauh takin kalphung a siam bawk.
Vantlang tana hriat tur chin dah chhuah chin atangin Center for Strategic & International Studies (CSIS) chuan July thla tawp thleng khan US hian Patriot missile 759 atanga 827 inkar a la nei a, hei hi indona chhuah hmaa a neih, 2,330 hmun thuma thenkhat hmun khat chuang a ni.
US hian anmahni beihna lo dan leh kah thlakna, terminal high altitude area defense (THAAD) missile a neih 60% chuang a hmang tawh niin Marine Corps colonel thin, CSIS senior adviser ni bawk, Mark Cancian-a chuan Nilaini khan a sawi bawk.
US hian Iran nena an indona bakah ralthuam a mamawh hle a, neih belh dan a dap mek zel a ni.
Ralthuam tlachhama sawina Trump-a’n pha
