Raltlan chhuahtirte thlen chin hriat loh

Bangladesh aTanga Mizorama tlanchhia, Myanmar lama chhuahtir lehte chin hriat a ni rih lo a, Myanmar an lut ta em tih pawh hriat a ni lo.
January ni 11 khan Bangladesh aTanga Mizorama tlanchhia, Zo hnahthlak mi 28-te chu Myanmar lama kaltir an ni a, Myanmar-a Samang khua emaw an pan turah ngaih a ni.
Raltlante hi Lawngtlai district-a VaThuampui-a lut an ni a, chuta Tanga Hruitezawla an kal chu Assam Rifles-in lain Tuithumhnar-a an camp-ah chawlhkar khat vel an kawl a, January ni 10 khan an chhuahtir. Tuithumhnarah hian awm zui turah an inngai a, a zanah khawtlang hruaitute pawh an awmna tur ngaihtuah hian an Thukhawm a, mahse a tukah Assam Rifles-in an hruai khawm leh.
Zorinpui-ah kalpuiin Myanmar pana chhuahtir tum an ni a, a rem loh avangin tlai lamah Kakichhuah panpuiin, zan tirah Myanmar pana chhuahtir an ni ta a ni. Anmahni hruai khawmna leh Myanmar pana chhuahtirnaah hian Assam Rifles te bakah Mizoram sorkar hnathawkte an tel tih thu dawn a ni.
Myanmar-a Samang khua pan tura ngaih an ni a, mahse Samang hi an la thleng lo tih thu dawn a ni. Khaw dangah an kal nge kawngah an la thang tih hriat a ni lo. Puitling mipa pariat leh hmeichhia panga an awm a, mi dang 15 chu naupang an ni a, nausen pakua an tel tih thu dawn a ni.
Myanmar aTangin mi an tlanchhiat laiin Samang velah hian Bangladesh aTangin Zo hnahthlakte tun hnaiah an tlanchhe fo a, tunah pawh hian raltlan kawl lai an nei. Bangladesh aTanga Mizorama tlanchhe turin ramri velah BSF an duty ngawrh a, Mizorama luh a har avangin Myanmar lam pan ta mai hi an awm Thin tih thu dawn a ni.
Thu dawn danin, tun hnaiah Bangladesh-a Chittagong Hill Tracts velah an inkap nasa ta lo a, mahse an la ralmuan loh avangin tlanchhiat tum an la Thahnem a, Mizorama luh a har tak avangin an mangang hle.