Raltlan zirlaite’n A AW B thiam tawh

A hmaa sikul la kai ngai lo an awm a, sikul kai tawhte
pawh Bengali tawnga lehkha zir thin an ni. Mizoramah an raltlan a, tunah chuan A AW B an thiam tawh.
A AW B an thiam han tih hian, ziak leh chhiar an thiam tihna a ni a, A AW B an hmang thiam tawh tihna a ni – a hranpaa zirtir pawh an ngai tawh lo.
Bangladesh atanga Mizorama tlanlut raltlante luhka ber Parva III-a Govt Primary School-ah Mizoram sorkar thu angin raltlan naupangte luhtir (admit) an ni a, he sikula lutte hian A AW B an thiam vek tawh.
Bangladesh-a Chittagong Hill Tracts-a Zo hnahthlak, Mizorama raltlante hi an khuaah Bengali tawnga lehkha zir, Bengali medium-a lut an ni. Chuvangin Govt Primary School, Parva III-a lutte pawh pawl 3 te, pawl 4 te ni mah se ziak leh chhiar thiam lo ang thawthang an ni a, A AW B atanga zirtir an ngai.
KG leh pawl 1-a lutte chu, a khaw mite nen an inang reng a, a khaw mite pawh A AW B atanga zirtir chawp an ni. A pawl sang lama mite hi chu an pawlpuite thiam sa kha a hranpaa zirtir an ngai a, zirtirtute’n A AW B atangin an zirtir a ni.
An headmaster Elvis Rochamliana chuan an sikula lut raltlan naupangte’n A AW B an thiam vek tawh a, an ziak thiam a, an chhiar thiam bawk tih a sawi. Pawl 3 leh pawl 4-a mite pawh a hrana zirtir an ngai tawh lo tih a sawi bawk.
Raltlan naupangah hian thiamthei tak te pawh an awm tih a sawi a, July thlaa first term an exam pawhin pawl 1-a pakhatna chu raltlan a ni tih a sawi.
Session tirah raltlan naupang 42 an awm a, mahse khaw danga insawn te an awm avangin 38 vel an la awm.
“KG leh pawl 1-ah hi chuan a khaw mite pawh thiam sa an ni lo a, raltlante nen an inang a. A chung lamah chuan a khaw mite lo kalsan tawh kha zirtir an ngai a, tunah chuan chutia zirtir pawh an ngai tawh lo. An thiam vek tawh,” an headmaster chuan a ti.
Raltlan naupangte’n sikul nuam an ti tih a sawi a, mid-day meal an siam kep a, mid-day meal kan ei dawn tho tia chaw ei lova sikul kal te pawh an awm thin tih a sawi.
An hriat danin, naupang thenkhat chu an khuaah sikul a awm lo a, sikul kal tura khaw danga kal ngai tur te an ni. Chuvangin parva III-ah hmun leh hmuna sikul an kal thei chu an lawm ve khawp mai tih a sawi.