Raltlante kirtir leh, sawisa bawk

Tun hnaiah BSF te’n Mizorama tlanchhiat tum, Bangladesh atanga harsa taka Mizorama lutte an kir tir thin a, Thawhtanni pawh khan kirtir an nei leh.
Raltlan, Mizorama lutte an kirtir bakah BSF te hian an sawisa a, anmahni ngaihventu pakhat pawh damdawi ina hruai ngai khawpin a awm tih thu dawn a ni.
Thu dawn danin, August ni 5-a BSF te’n an kirtirte hi mi 23 vel an ni a, hmeichhia leh naupang an awm nual. Thudawn pakhatah chuan naupang hi panga chuang an ni ang tih a ni. Mizoram chhungah hian ni khat leh zan khat an awm hman nia hriat a ni.
Bangladesh-a Chittagong Hill Tracts-a Mualpi khua atanga Mizorama lut nia hriat an ni a, BSF te hian Mizorama lut an awm tih hriain an chhui zui a, Kantuli khaw bulah chhui chhuakin, chuta tang chuan an kirtir leh tih thu dawn a ni.
BSF te hian hmeichhia leh naupang tih loh mipa an sawisa a, an sawisa na viau tih thu dawn a ni. Chakpa putar pakhat, anmahni lo hmutuin a khawngaih lutuk a, tihngaihna a hre si lo a, a tap hial tih thu dawn a ni bawk.
Anmahni ngaihventu pakhat pawhin kut a tuar a, BSF te hian Lawngtlaiah damdawi inah an hruai tih thu dawn a ni.