A career-a hnawh-chhuah tawk zing ve tak Sergio Ramos chu Pathianni zan La Liga inkhel pakhata Real Sociedad leh Sevilla inkhelh tumin red card pek a ni a, a career-a tum 29 hnawhchhuah a tawhna niin, Spanish Primera Liga bikah a vawi 21-na a ni a, La Liga history-a red card hmu hnember a ni!
Sevilla defender hian minute 88-ah tawlh paha hlauhawm taka Brais Mendez a hnawl avangin a tirah yellow card pek zet a ni a, chu pawh he game-a yellow card a lo hmuh tawh avangin khelmual chhuahpuina tham a ni tho tho a, chutah referee-in a thutlukna a ennawn a, straight red hmangin a chhuahtir leh ta zawk a ni!
Real Madrid leh Spain defender hlui hi tunah kum 37 mi lai ni tawh mah se a hro hrang nat vanglai ang tho khan a che pawh a la rum tih a hmuh theih a, football khelh a chawlhsan hma chu red card hmuh hi a sim tak tak thei dawn lo a nih hmel!
Mualneitu Sociedad laka 1-2-a an tlawm tumin Sevilla winger Jesus Navas pawh Ramos-a chungchanga referee thutlukna a sawisel duhthawh deuh avangin hnawhchhuah a ni ve bawk a, ani erawh a career-a La Liga game bika red card a hmuh vawikhatna niin, kum 38 mi hian hnawhchhuah tawk loin Spanish top flight a chhuahsan zo bik dawn ta lo a ni!
Ramos thung kha kum zabi 21-na chhunga red card hmu ngun ber niin, hetih kawngah hian a elpui lian pahnih Rafael Marquez (21) leh Felipe Melo (20)-te’n an pha lo viau.
Pathianni zana a red card erawh kumin nipui thawt laia an khaw club a zawm hnua a red card hmasaber a ni thung.
Sevilla kha a zawnin league game sarih chhung an chak zo ta lo a, table-ah pawh 15-na daih thut tawhin, Real Sociedad erawh an kawtkaia an point thum hlawhchhuah nen panganaah an chho.
Ramos an hnawtchhuak leh tawh!
