Mizoram chu ramri depa awm a nih avangin ruihhlo a hluar a phah a, cancer leh HIV tamna a nih tel avangin nasa lehzual heng laka fihlim tura tan lak a ngai tih larsap Gen. Vijay Kumar Singh (Retd) chuan a sawi.
Nasha Mukh Bharat Abhiyan & Mission SPANDAN hnuaia Brahma Kumaris buatsaihin ruihhloa fihlim khawtlang siam tura hmalakna “Addiction Free Society Campaign” chu St. Paul’s Higher Secondary School Aizawlah Thawhtanni khan neih a ni a. Hmanpuitu larsap chuan, ruihhlo leh a kaihhnawih chu mitin chawk buaitu a ni, tiin, ruihhlo ngawlvei awm lohna khawtlang kan siam theih phawt chuan danglamna nasa tak a thlen dawn tih a sawi. India ram chu thalai tamna a ni a, nakin lawka India innghahna ni mai tur thalaite chu ruihhlo bawiha an luh lohna tur leh hrisel leh hna thawk tlak an nih theihnan kaihhruai a tul tih a sawi a ni.
Mizoram chu ramri depa awm a nih avangin ruihhlo a hluar phah nia sawiin, cancer leh HIV case tamna state kan nih bawk avangin nasa lehzuala tan lak a tul a; inzirtir a, tumruh leh tha taka thawkhoa kan beih phawt chuan kan hneh ngei a beisei tih a sawi bawk.
Zirlaite chu ruihhlo laka fihlim tum tlat tur leh thlemna an tawh pawha hnawl ngam a, hmakhaw eng tak an neih chu ruihhlo avanga chhiat tir phal lo turin a fuih.
Campaign-ah hian Brahma Kumaris Hqrs Mount Abu Rajasthan atanga lokal Dr. Sachin Parab chuan a zirtir a. Vaihlo, zu, drugs leh mobile phone ngawlveina laka filhim turin zirlai thahnem tak an intiam a ni.
Ramri depah Mizoram a awm avangin ruihhlo a hluar phah – Larsap
