India sawrkarin Indo-Myanmar ramri hung a tum leh free movement regime (FMR) tihtawp a tumnaah Mizoram a nghawng lo tura ngaihna avangin helh tehchiam loh phawt a that a rin thu chief minister Lalduhoma chuan a sawi.
New Delhi-a Union Home minister hnena FMR tihtawp tum leh ramri hung tum an duh loh thu a thlen nawnnaa an inbiakna boruakah a lawm tih Lalduhoma hian sawiin, “An (India sawrkar) ti dawn lo chu kan ti ngam loa, chuti taka kan lo helh hi a ngai awm lo mange aw ka ti. Manipur lam chu in duh leh hung ula, keini tel loin kan ti a. Home minister hian an tih loh tur thu intiamna chu a nei hauh loa, kan inkawmna boruak atang erawh chuan lo helh tehchiam lo phawt a that a rinawm,” a ti.
FMR tihtawp tih pawh hi ramri hrulah check point te siam a nih phawt loh chuan thil tih mai theih a ni lo hrim hrim tih a sawi a. Prime minister-in ramri hrul khua, a bikin China ramri tih hmasawnna tur a duan chu Mizoramin lo chhawr ve theih an inbeisei. Chumi nena tankawp chuan ramri hrul khuaten a bik taka chhawmdawlna leh enkawlna an hmuh theih an beisei tih a sawi a ni.
NGO ten boruak tha tak an siam thinna azarah lawmthu a sawi tih chief minister hian a sawi rualin, Mizo kan nihna leh Kristian kan nihnaah kan tiha mawi leh mawi lo thliarthiam a tha tih sawiin, “Lim inhalsak tihte hi, a awmzia chu thi tura induhna a ni a, a na mah mah. Heng hi chu Mizo lakah a ni emaw vai lakah a ni emaw tumah hian ti tawh lo turin kan inngen a. Kan ngaihmawh leh duh loh zawng tih lantir dan dang tam tak a la awm. Heng kan tih ve hian miten min en dan a dang thei a, harsatna kan tawh phah thei a ni,” a ti.
Ramri hung leh FMR-ah chief minister ngaih a tha
