State pahnih ramri kaihhnawiha Mizoram leh Assam sawrkar aiawhte dawhkan kilin an inbe leh dawn hnai tawh nia sawi a ni a. Mizoram china police duty-na border out post panna kawng tha lo chu sawrkarin fur ruahtui tlak tlem deuh veleha siamthat tumin a inbuatsaih mek tih sawi a ni bawk.The Aizawl Post zawhna chhangin Home minister K Sapdanga chuan, state pahnihin ramri chungchanga inremna an neih theihna turin sawrkar pahnih aiawh an inbe leh hnai tawh a, tun tum hian Aizawlah neih tum a ni tih a sawi. Kumin April-a Assam-a MLA inthlanpui neih hma khan an ni lam hian inbiak an rawn rawt a, inthlan kaihhnawih engemaw ken tel a neih an hlauh avangin an lo pawm loa, hun reilote hnu ah state pahnih aiawh hi an inbiak theih a beisei tih a sawi a ni.
Hetihlai hian Assam leh Mizoram inrina bulhnaia Mizoram Police duty-na hmun thenkhatah inkalpawhna tha lo awm chu siamthat thuai tum a ni tih Home minister hian a sawi.
Kolasib district bawrhsap hnuaiah heng kawng thawmthatna tur hi cheng nuai 45 vel dah a ni a, a huna hna thawktu tur koh hman a nih tak loh avangin an thawk mai loa, furin a rawn nang zui ta tih a sawi. Home department atangin kawng thawmthatna tur hi ruahman turin an ti a, cheng vaibelchhe 5 chuang daih ruahmanna chu, sawrkar sum dinhmun nen a sang deuha an hriat avangin tihniam turin an ti leh a, cheng nuai 30-35 vela thawmthat theih dan ngaihtuah niin, khua a that ve leha hna tan theih turin an inruahman tih a sawi a ni.
Kum 2021 July-a Mizoram leh Assam-in ramri kaihhnawiha tualthu chhia an neih hnu ah, state sawrkar pahnih aiawh hi tum 5 vel an inbe tawh a, minister level leh commissioner/ secretary level-ah te a ni. Minister level-a inbiak hnuhnung ber chu 2024 August 9 a ni a. Hemi tum hian 2024 February 9-a state chief minister pahnihten an inkarah inhriatthiamna leh duhsakna nena ramri buai chinfel a nih theihnan inpekna nghet tak nena hma lak thin nise tia thu an dah chu nemngheh nawn niin, hemi tuma inbiakna pawh hi ramri sawifel tum lam aiin, chumi kawng zawhna atan ‘Goodwill Mission’ tia vuah a ni zawk. He inbiakna rahchhuah chu, state pahnih inrinaa district thuneitute ruahman angin, infiamna leh thildang hmanga intlawhpawh tawna hun hman ho tam lam hawi a ni.
Inbiakna hnuhnung ber erawh 2025 April 25 khan Guwahati-ah secretary level-a neih a ni thung a. Mizoram atangin Home secretary Vanlalmawia hoin palai 7 an kal.
Tunhnaia thuthar thehdarhtute a kawmnaah zawhna chhangin chief minister Lalduhoma chuan, Assam CM Himanta Biswa Sarma nen an lo inkawm tawhnaah, an pahniha chief minister an nih dun chhung chuan, ramri kaihhnawiha intihbuai loh hi tawngka in thu an thlung dun tih a sawi a ni.
Ramri kaihhnawihah inbe leh hnai BOP panna kawng siamtha dawn
