Ran chawa intodelh tumin
vaimim leh bekang chin tir
Mizoram sawrkar chuan sa, bawnghnute leh artuia intodelh tuma hma a lak meknaah ran chawa intodelh tel tumin Bana Kaih Policy hnuaiah a enchhinna hmasa atan vaimim leh bekang ching turin khaw 10 a thlangchhuak.
AH&Vety minister C Lalsawivunga chuan sa, bawnghnute leh artuia intodelh thei tura ngaih ni siin tun thlengin kan la intodelh loa, henga intodelh tur chuan ran chawa kan intodelh tel a ngai a, ranvulhtute harsatna lian ber chu ran chaw a ni tih a sawi.
“Ran chawa pawimawh deuh chu vaimim leh bekang a ni a, hei hi thahnem tak kan thar chhuah a ngai. Pilot project siamin vaimin leh bekang thahnem tak kan thar theihnan sawrkarin hma a la a, tunah hian India ram hmun dang bakah Myanmar atangin ran chaw tur vaimin kan lalut tam a, hei hi kan tihtawp theihnan he pilot project hnuaia beneficiary zawng zawng rim taka thawk turin ka chah a ni,” a ti.
Pilot project atan hian Bana Kaih Scheme hnuaiah cheng nuai 408.18 hmuh a ni a, 1st instalment-ah nuai 220 sen a ni. District pathum – Champhai, Saitual leh Khawzawla khaw 10-ah kalpui tum niin, kuthnathawktu chhungkaw 464 in vaimim leh bekang tharchhuah runpui an kalpui dawn a. Vaimim chi quintal 38.29 leh bekang chi quintal 16 sem tum a ni.
AH&Vety minister hian vaimim chi leh bekang chi hi Thawhlehni khan Champhaiah a dawngtu turte hnenah a sem a. Hemi rual hian National Livestock Insurance Programme a khuhhawng nghal a ni.
“Animal insurance hi National Livestock Mission hnuaiah sawrkar laipui chuan a ti reng a, mahse, keini state tan chuan a harsa hle a ni. Animal insurance tha tak kan neih theihnan hma kan la a, ASF avangin insurance company-ten insurance an rawn titha duh loa, chief minister-in a vei a, kei pawhin central minister ka dawr a, kan dilna tih hlawhtlin niin, state matching share 30 kha 10 (90:10) ah min tih hniamsak ta a ni,” a ti.
Ran chawa intodelh tumin vaimim leh bekang chin tir
