Randy Owen-a’n BMI Icon Award dawng dawn
November ni 19-a Nasville-a 72nd annual BMI Country Awards an sem turah country group Alabama frontman Randy Owen chu BMI Icon award hlan a ni dawn.
BMI Icon award hi a hlaphuah tha tak tak avang leh country music tana a thawh hlawk em avanga hlan tur a ni a,BMI Nashville VP (creative) Clay Bradley chuan, “Country music tana Randy Owen thawh hlawk zia hi tehchhuah ngaihna pawh a awm lo, a hlaphuah te pawhin he genre tana hniak a hnutchhiah hi engtikahmah a reh tawh lovang. A talent hian Alabama pawh country band hlawhtling berte zingah a hlangkai a, a hla melody leh hlathu hriatnuam tak te hian artist tam tak hnehin, a entawn nasa hle a ni. BMI Icon Award kan hlan thei tur pawh hi kan phur tak zet a ni,” a ti.
BMI Icon Award hi artist-writers Matraca Berg, Toby Keith, Loretta Lynn, Willie Nelson, Merle Haggard, Dolly Parton, Kris Kristofferson, Dean Dillon, Hank Williams Jr., Stevie Nicks, Little Richard, Carole King, Patti LaBelle, Brian Wilson, James Brown, Janet Jackson, Bo Diddley, Holland-Dozier-Holland, Peter Gabriel, Al Green, Van Morrison, Sting, Bryan Ferry, Carlos Santana leh Los Lobos te pawhin an lo dawng tawh.
Owen hian BMI Million-Air Award pawh 25 chuang a dawng tawh a, 2000 khan BMI President Award dawngin, BMI country song of the year pawh 1989 khan ‘Fallin’ Again’ avangin a dawng tawh bawk. An group Alabama angin Billboard Hot Country Songs chart-a No.1 kai thei hla 33 an nei tawh bawk.
Owen hi Country Music Hall of Fame-ah Alabama hi lak luh an ni tawh a, Musicians Hall of Fame leh Alabama Music Hall of Fame-ah te lak luh an ni tawh bawk. Hei bakah hian Country Music Association-in kum thum chhung a zawnin entertainer of the year-ah an thlang tawh a, Owen bik hi Nasville Songwriters Hall of Fame-ah 2013 khan lak luh a ni tawh bawk.
Randy Owen-a’n BMI Icon Award dawng dawn
